Venezuela ta bibando un acontecimento historico cu entrega di cas number 1 miyon 500 mil, danki na e proyecto Gran Mision Vivienda Venezuela (GMVV). E programa a ser crea na 2011 riba iniciativa di e lider di revolucion Bolivariano Hugo Chavez, y cu den cinco aña a duna 1 miyon 500 mil cas pa famia den henter e pais.
E acto di entrega tabata dirigi pa presidente di Venezuela, Nicolas Maduro, cu a bay na parokia di Cua, na estado Miranda pa duna e yabi di nan cas nobo na un pareha, forma pa Johana Bello y Jhon Delgado, mayornan di Nicolle Paule, un mucha muhe di 8 dia y cu lo bay crece den un cas propio na sector di Riu Tuy.
E vivienda cu e famia Bello – Delgado a haya ta na mita di e meta cu tabata stipula pa Gran Mision Vivienda Venezuela, di construi y duna 3 miyon cas pa aña 2019.
“E entrega di cas number 1 miyon 500 mil ta un record mundial (…) ta representa un esfuerso heroico. Nos ta loke nos ta papia y loke nos haci. Nos por, Venezuela. No lo existi un famia na Venezuela cu no lo tin un cas digno” Maduro a comunica.
