Corte di Prome Instancia diamars ultimo a otorga un compensacion na un prizonero di 28 aña di edad cu a sufri herida permanente y severo ora otro prizonero a hink’e riba 14 di februari 2017.
Corte a tene gobierno di Sint Maarten responsabel pa siguridad den prizon, pa cual e Hues a dicta cu gobierno mester paga e prizonero un avance di 100 mil Florin Antiano te cu determina e suma exacto di e daño. E detenido, kende a sostene e herida y a keda paralisa, a haya 6.120 Florin pa e echo cu a mar’e na su cama di hospital durante su tratamento. E resultado di esaki tabata cu el a sufri heridanan innecesario, segun Corte.
A hinca e prizonero mientras e tabata sintando su sentencia di 3 aña pa a ataca un homber cu un machete. El a yega di comete otro crimen pa cual husticia a persigui e. Den un rapport di april 2017, Conseho di Husticia a indica cu e estado di siguridad interno den e prizon ta laga hopi di desea. “Esaki ta aplica ambos pa e prevencion y maneho di calamidad, como tambe pa e aspecto di maneho di rabia y maneho pa descurasha uzo di droga”, e conseho a skirbi den nan rapport.
“E combinacion di un falta di vision y maneho, ekipo cu no ta traha, falta di preparacion, falta di staf y di trahadonan supervisor, presencia di armanan traha na man, arma blanco y arma di candela, inspeccionnan no structura, por ehempel, ta crea un situacion tenso y insostenibel paden di e prizon y tin un influencia directo riba e siguridad di tur persona kedando bou dak di e prizon”.
