(AP) – Gobierno di Senegal a temporariamente suspende data di celular riba diadomingo mientras e pais ta lidia cu problemanan mortal entre polis y sostenedornan di e lider den oposicion Ousmane Sonko.
E Ministerio di Comunicacion, telecomunicacion y economia digital a bisa cu pa causa di e plamamento di “mensahenan cu un contexto di desorden publico den cierto localidadnan,” a suspende data durante cierto periodonan.
E declaracion aki a bini despues di varios dia di problemanan mortal den e nacion di West Africa entre sostenedornan di Sonko y cuerpo policial. E cantidad di fayecimentonan oficial te ainda no ta conoci. Gobierno ta bisa cu esaki ta na 15 persona, incluyendo dos miembro di e forsanan di siguridad sinembargo oposicion ta bisa cu 19 persona a fayece caba.
E problemanan aki a cuminsa diahuebs siman pasa despues cu Sonko a ser sentencia di corupcion di hobennan sinembargo a retira cargonan di violacion di un muhe cu a traha na un spa y di a haci menasanan di morto contra e muhe en cuestion. Sonko, ken no a presenta na su huicio den Dakar, a ricibi un sentencia di 2 aña den prizon. Su abogado a bisa cu te ainda no a duna ordo pa su aresto.
Sonko a sali den tercer luga durante Senegal su eleccion presidencial cu a tuma luga den aña 2019 y ta popular cu e pais su hubentud. Su sostenedornan ta mantene cu su problemanan legal ta parti di e gobierno su esfuerso pa preveni cu e lo bira candidato den eleccion cu lo tuma luga den aña 2024.
Sonko ta considera di ta e competencia principal di president Macky Sall y a urgi Sall pa declara publicamente cu e no lo busca un tercer termino den mando. Sonko te ainda no a ser mira ni a scucha di su persona desde cu a declara veredicto den e caso.
