Den reunion di Conseho di Ministro di Reino na Den Haag awe, diarazon 9 di april, a tuma decision preliminar encuanto e situacion na e islanan Hulandes den Caribe. Den un rueda di prensa ‘na distancia’ ministro di Interior y Asunto di Reino, Raymond Knops a duna un declaracion cortico den cual el a enfatisa e necesidad di ta solidario den e situacion dificil cu e crisis di coronavirus a ocasiona y a contesta pregunta di medionan di e islanan.
Concretamente a dicidi cu ta honra e peticion di e islanan Sint Maarten, Curaçao y Aruba pa e punto mas urgente, cu ta un prestamo inmediato pa resolve problema di liquidez. Pa Aruba esaki ta significa cu e peticion pa Afl. 42,8 miyon ta aproba, cu ta cubri e prome 6 siman, te cu fin di mei. Esaki ta encera ayudo na persona desemplea y empresanan den problema pa e situacion actual. Tocante e trayecto despues lo sigui deliberacion cu cada isla separa. E prestamo preliminar aki lo ta sin interes, y cu 2 aña sin pago riba e prestamo. Despues di e periodo aki lo por considera financia esaki di otro forma, unda CAft a conseha pa considera un refinanciamento cu bono a base di un ‘sinking fund’ (fondo pa garantisa cu recursonan ta presente dia cu e fiansa madura). Knops a base di pregunta haci encuanto e consideracion pa no duna parti como donacion, a bisa cu despues di e periodo inicial aki, por considera pa haci e continuacion di otro di otro forma, unda e no a exclui donacion.
