Diamars  e regimen militar di Nicolas Maduro a adverti presidente di Merca, Donald Trump, cu gobierno lo continua cu eleccion pa Asamblea Constituyente, a pesar di menasa di Washington di tuma algun sancion economico contra Venezuela.

“Nada ni ningun hende tampoco lo por detene, constituyente ta continua. Awe pueblo Venezolano ta liber y lo responde uni dilanti di menasa insolente cu imperio xenofobo y racista a lansa contra Venezuela,” Samuel Moncada, canciyer di Venezuela, a splica. “Awe (diamars) ta un dia scur den relacion entre Venezuela y Merca, y tambe den relacion entre America Latino y gobierno di Merca. Presidente di Merca ta disfruta hopi,  ora cu e ta humiya otro paisnan, e ta kere cu e por cu Venezuela, pero e no por cu Venezuela,” Moncada a bisa.

Ministro di Relacion Exterior di Venezuela a informa cu den cumplimento di  orden di Nicolas Maduro “ lo cuminsa un revision profundo riba relacion di Venezuela cu gobierno di Merca, pasobra nos no lo acepta cu Merca of algun otro gobierno lo bin humiya nos. Nos  no lo acepta cu ningun hende lo bin pa humiya nos.” Moncada a bisa cu “Merca ta menasa e pueblo di Venezuela cu sancion economico. E menasa ta un abuso, ningun pais por acepta e situacion aki. Ta prohibi algun sorto di menasa tocante aplicacion di sancionnan. E gobierno di Merca ta tuma un posicion contra un proceso di eleccion, contra e voz di pueblo, contra un pueblo cu nos a mira participa. Venezuela ta liber, soberano y independiente. Ta lamentabel cu nos tin un sector di oposicion cu a bende nan pais.”