Diahuebs ultimo Gobierno di Nicaragua a rechasa intervencion stranhero y a adverti cu na e pais “no tin espacio pa otro voznan”, den mey di e crisis socio politico local ora ta falta nuebe luna pa eleccionnan presidencial dia 7 di november.
“Nos ta Nicaraguense, y nos ta bisa nan cu entre Nicaraguense nos ta compronde nos mes, no tin espacio pa otro voznan, e mesun identidad di injerencia y interventor, den esaki no, cu otro modo no”, e vice-presidente Rosario Murillo, a bisa.
Na october ultimo Asamblea General di Organisacion di Estadonan Americano (OEA) a resolve pa cu Nicaragua lo haci reforma di leynan pa garantisa un “eleccionnan creibel”, loke segun oposicion, ta implica observacion nacional e internacional.
“Pa via di e injerencia ey te ainda nos ta akinan, nos ta akinan cu mente, cu curason, inteligencia y cu amor, di frente”, e prome dama tambe a bisa ora a referi na antiguo invasion Mericano riba teritorio nicaraguense.
Gobierno di presidente Daniel Ortega a wordo critica paden y pafo di Nicaragua pa e recien aproba y denomina “pakete di leynan represivo”, cu ta impedi ricibi recursonan for di exterior, regula informacion riba dispositivo digital incluyendo si ta personal y impedi aspiracion pa funcion di eleccion popular pa esunnan cu lo critica gobierno.
Entre e leynan nobo ta e Ley di Regulacion di Agentenan Stranhero, conoci como “Ley Putin”, Ley di Ciber delito, yama “Ley Mordaza” y Ley di defensa di derechonan di pueblo pa independencia, soberania y auto determinacion pa paz.
Oranan prome di e anuncio e relator special di Organisacion di Nacionnan Uni (ONU) riba Derecho di Libertad di Reunion Pacifico y di Asociacion, Clement Nyaletsossi, a afirma cu ta existi preocupacion na organismo pa e crisis di derechonan humano na Nicaragua, y cu e Gobierno no ta permiti su entrada na e pais.
