Gobierno di Estadonan Uni a anuncia ayera e expulsion di e pais di 15 diplomatico di embahada di Cuba na Washington, como consecuencia di e misterioso atakenan acustico contra su personal na La Habana.
Den un nota oficial, e Secretario di Estado, Rex Tillerson, a informa cu su oficina a comunica na embahada Cubano “e orden di salida di 15 di su diplomaticonan den su embahada na Washington,” aunke no ta responsabilisa Cuba pa e atakenan riba e personal Mericano.
Segun Tillerson, e decision aki a ser adopta pa e “fracaso di Cuba den adopta medida pa protege nos diplomaticonan di acuerdo cu nan obligacion segun Convencion di Viena.”
“Nos ta mantene nos relacionnan diplomatico cu Cuba, y lo sigui coopera cu Cuba segun cu nos ta bay ta investiga e atakenan aki,” e Secretario di Estado a expresa.
Poco prome cu esaki, un funcionario di e departamento di Estado a informa cu a entrega na e embahada di Cuba un lista cu e nombernan di e 15 funcionarionan, cu tin siete dia desde ayera pa bandona teritorio Mericano. A afirma tambe cu no a declara nan persona non grata.
Di acuerdo cu e fuente di departamento di Estado, gobierno Mericano no ta responsabilisa Cuba pa e atakenan cu ultrasonido, pero si pa loke nan ta considera su incapacidad pa duna proteccion na personal diplomatico stranhero.
“Nos posicion no ta di presumi e culpa di e Cubanonan. Pero ta rekeri di gobierno Cubano di ta capaz di cumpli cu su obligacionnan encuanto seguridad, bienes y proteccion di diplomatico stranhero den su pais,” e funcionario a bisa.
Diabierna pasa, departamento di Estado a anuncia su decision di reduci te mita su personal den su embahada na La Habana, a raiz di e atakenan cu te awor no a logra splica.
