Enrique Márquez, diputado di Asamblea Nacional pa Mesa di Unidad, a bisa cu gobierno ta busca pa manipula e dialogo cu oposicion na su beneficio, encuanto e eleccionnan regional, programa pa dia 15 di october.
E parlamentario a señala cu e conversacionnan cu gobierno a inicia basta tempo pasa, pero no tabatin fruto pasobra no tabatin “un entendimento minimo.”
“Tin conversacion desde basta tempo caba, pero nan no tabatin fruto. No tabatin forma pa por tin un entendimento minimo, ni sikiera pa por ofrece e pais un resultado chikito, ni sikiera pa esey,” Márquez a expresa den un entrevista na Televen. El a agrega cu ta pesey cu oposicion ta señala cu no tin dialogo, ya cu segun nan, ora nan purba conversa nan ta topa “cu un muraya inmovible, relaciona cu nan vision di e pais.
Mientras tanto, Enzo Scarano, ex-alcalde di e municipio San Diego, den estado Carabobo, a haci un yamado na e ciudadanonan pa bay vota den e eleccion regional, programa pa dia 15 di october.
E ex-funcionario a alega cu vota ta un derecho y abstene di participar ta “sigui e wega di e regimen.”
“Cuidao cu yamado pa abstencion, e voto ta un derecho. Nada ni niun hende mester kita esey di bo! No vota ta igual na sigui e wega di e regimen,” el a skirbi riba Twitter diadomingo.
