A pesar cu un mocion a wordo presenta den parlamento Hulandes cu a haya sosten di e mayoria di nan miembronan, esaki no kiermen cu e presencia masivo di barconan di guera di otro paisnan cu sosten di Hulanda ta bay sosode inmediatamente den nos region.
Ayera premier di Aruba, Evelyn Wever-Croes a bisa cu den un decision asina gobierno di Aruba tambe kier tin un palabra. E mandatario a declara cu e mocion aki ta parti di un deseo, esaki a pesar cu e mocion a haya sosten di Tweede Kamer. Pero e no ta un decision di gobierno Hulandes pa manda barconan di guera pa nos region. Tambe prome minister di Aruba a expresa cu gobierno di Hulanda tampoco ta mira ‘e menasa eminente aworaki riba e tema aki.’
E no ta kere cu e mocion aki ta bay aumenta inmediatamente e presencia di barconan di guera den nos bisindario. Esaki tabata parti di e declaracion cu prome minister a duna tocante e mocion cu partido Groen Links a haci pa urgi gobierno di Hulanda pa bin cu un sondeo profundo pa un miho defensa di e islanan di reino Hulandes contra Venezuela.
Mocion y menasa
Ayera premier Wever-Croes a bisa cu el a tuma contacto mesora cu ministerio di relacion exterior di Hulanda pa e por haya mas informacion tocante e asunto aki. “Sinceramente nos na Aruba no ta sinti e menasa ey asina tanto. Manera cu talbes e miembro di e parlamento aki si a sinti’e… ”, el a bisa.
Ta asina cu parlamentario di fraccion di Groen Links a referi na declaracion cu presidente Maduro di Venezuela a yega di haci cu e islanan Hulandes ABC ta pertenece na su pais. Prome minister di Aruba a bisa cu e tambe a yega di tende esey, pero berdaderamente nos no ta sinti cu esaki ta un menasa latente cu awor bo tin cu atende cu esaki. E ta kere cu no ta cuestion cu tur cos cu bo ta scucha bo tin cu actua. E ta haya cu ya caba nos tin basta problema pa awor atende cu esaki. P’esey e mandatario den nomber di Aruba a pidi pa gobierno di Hulanda warda un rato tocante e asunto aki.
E mocion aki a pidi gobierno Hulandes pa bay papia entre otro paisnan occidental cu Francia pa mira si mester incentiva e presencia di nan marina den nos area Caribense, ya cu Francia tambe tin islanan cu ta forma parti di nan. Esaki pa wak con nan por prepara miho pa cualkier eventualidad. “Pa wak con nan ta yuda y pa nan ta alerta, talbes extra alerta ”, e di.
E mandatario local a lamenta cu e no tabata presente den e reunion cu a tuma luga na Tweede Kamer durante su bishita siman pasa na Hulanda. Ya cu e por a splica e parlamentarionan cu esaki no ta un tema pa bin cun’e aworaki cu hustamente Aruba y otro islanan di Reino ta habriendo frontera cu e pais bisiña di Venezuela y treciendo trankilidad den e relacion aki. Pero e ta compronde cu parlamento Hulandes ta un organo independiente y autonomo.
Re apertura frontera maritimo
E importacion di fruta, berdura y pisca for di estado Falcon mester a cuminsa ayera, pero Venezuela tabatin dificultad ainda. “A nos ta cla pa ricibi nan”, prome minister a bisa. Ya caba e sistema di control ta cla pa ehecuta nan. Supuestamente e prome boto Venezolano cu fruta, berdura y pisca ta drenta awe pa nos waf di Barcadera. Esaki ta sosode despues di casi 6 luna cu gobierno di presidente Nicolas Maduro a impone un blokeo aereo y maritimo contra e islanan di Caribe Hulandes.
E tema di apertura di e frontera cu Venezuela, e mandatario local a trat’e na Hulanda siman pasa. “Hulanda a mira con nos mes a tene na palabracion”, e di. El a splica nan cu Aruba a manda un delegacion na estado Falcon siman pasa pa papia riba exportacion inicial di fruta, berdura y pisca, pero suheto na rekisitonan hopi stricto riba tipo di boto, tipo di carga y tambe riba e tripulacion cu ta bin. Nan mester cumpli cu rekisitonan legal pa por drenta nos isla. Te ainda e situacion no a normalisa totalmente, te hasta e operacion aereo ainda tin cierto dificultad pa algun ciudadnan di Venezuela. Pa tal motibo nan tin programa un reunion programa otro siman na Valencia pa atende cu e situacion aki.
