Riba website di Gobierno di Corsou, ministerio di Asuntonan General y prome minister Gilmar Pisas a informa cu durante reunion di Conseho di Minister dia 8 di februari ultimo, Gobierno di Corsou a tuma e decision pa propone Venezuela un fecha pa habri su frontera cu Corsou.
Conseho di Minister di Corsou a tuma e decision pa propone Venezuela pa e reapertura di frontera pa cu e parti maritimo y esun aereo tuma lugar riba dialuna dia 3 di april proximo.
Den e proximo periodo lo finalisa hunto cu Venezuela e ultimo detaye y condicionnan pa por yega na e reapertura riba e fecha stipila.
Gobierno di Corsou a bisa cu ta bay continua informando comunidad riba e proceso aki y ta keda pendiente pa Venezuela bay di acuerdo cu e fecha cu Gobierno di Corsou a propone.
Embahador di Hulanda na Venezuela, Robert Schuddeboom a comparti e comunicado riba su rednan social.
Yvan Gil, canciyer di Venezuela, a publica riba su pagina di Twitter un mensahe den cual a confirma e noticia. “Gobierno Bolivariano ta saluda e reapertura di frontera maritimo y aereo cu e isla di Corsou dia 3 di april proximo. Decision cu ta contribui na e desaroyo economico, interaccion social y fortalecemento di nos lasonan historico.”
