(CuraçaoChronicle) – Segun informacion cu a circula den medionan di comunicacion di Corsou, ayera gobierno di Corsou a cuminsa procedura sumario pa preveni cu e sindicatonan ta continua cu nan accion. E seis sindicato ABVO (ambtenaarnan), SAP (husticia), STARF (aduana y impuesto), NAPB (polis), STSK y DOEN (ambos di educacion) ta reporta esaki.
E movida di gobierno no ta bay preveni nan di haci uso di nan derecho pa actua, segun e seis sindicato a indica. E accion di gobierno no cay den bon tera. “Nos ta biba den un pais democratico y esey ta e motibo cu nos ta continua cu nos lucha pa haya nos derecho”, nan a indica.
E sindicatonan ta haciendo un yamado pa tur nan miembro bay den welga pa elimina e reduccion di 12.5 porciento for di mesa. E sindicatonan tambe kier separa e propuesta aki for di e Ley di Standarisacion di Salarionnan Top – ekivalente na e Wever-Croes norm di Aruba – cu ta enfoca riba esnan cu tin salarionan mas halto den companianan propiedad di gobierno.
Sindicato di Educacion SITEK tabata e gran ausente durante e protestanan riba diaranson. Segun su presidente, Dario Plantijn, e recorte di 12.5 porciento ya ta yegando na su final, y a acorda cu gobierno pa relaha esaki na 2023. Toch e no ta descarta cu Sitek por join e otro sindicatonan den futuro.
Potret di Extra.
