Gobierno di Corsou a anuncia oficialmente inicio di e trayecto pa reemplasa e escudo actual di Corsou pa un emblema nobo. Esaki pa fortalecé nos autonomia y dal stapnan cu fe den direccion di un epoca nobo pa Corsou. E emblema mester uni nos como pueblo, representando tur loke ta importante pa nos desaroyo propio. Esaki lo sosode conhuntamente cu pueblo di Corsou.
A traves di un trayecto participativo, esta un competencia, pueblo di Corsou ta bay haya oportunidad pa entrega nan mes diseño y alabes scoge nan emblema preferi. Un comision, cu ta consisti di expertonan riba e áarea di cultura, diseño y historia, lo haci un seleccion for di e diseñonan mas scogí pa pueblo y finalmente saca esun ganadó a base di criterionan stipula.
Un emblema nobo ta forma parti di e trayecto tan importante di identificacion di nos pais, cual ta trata e unificacion di nos sociedad diverso a base di norma i balornan cu nos ta identifica nos mes cu ne.
