E gobierno nobo cu ta den proceso final di formacion ta determina pa baha e edad di pension actual di 65 aña. Esaki tabata un tema cu fraccion di MEP yega cuestiona ora cu nan tabata den oposicion. Awor cu nan ta forma parti di e gobierno di coalicion (MEP-POR-RED) cu lo bay sinta proximamente, nan a dicidi di inclui e reduccion di edad di pension den nan programa di gobernacion.
Segun actual parlamentario y potencial minister di e proximo gabinete, Glembert Croes e asunto di baha edad di pension tin hopi prioridad cerca nan. Pa tal motibo un di e prome decisionnan cu nan lo tuma unabes cu e gobierno ta institui oficialmente ta e instalacion di un comision no pa evalua tur alternativanan pa baha e edad di pension actual, sino pa baha edad di pensioen di biaha.
“Un cos ta sigur! E coalicion nobo ta baha edad di pensioen.”
Parlamentario Croes kende actualmente ta pasando e proceso di screening hunto cu e otro candidatonan potencial pa bira minister, a indica cu nan deseo ta esun di baha e edad di pensioen manera tabata antes, kiermen 60 aña. Pero esaki no lo ta posibel di biaha. P’esey den e prome fase di evaluacion nan meta ta di reduci e edad di pension di 65 pa 62 aña.
El a tuma nota di partido AVP awor den oposicion, cu hisa edad di pensioen pa 65 aña tabata necesario pa salba e fondo di pensioen administra pa medio di Banco di Seguro Social (SVB). E decision aki a wordo debati y tuma den seno di e Dialogo Social. Pero e kier laga sa nos comunidad cu e gobierno nobo di coalicion ta bay instala inmediatamente un comision pa atende cu e asunto aki.
E comision aki no ta bay studia si esaki ta posibel of no. Mas bien e comision aki inmediatamente ta bay traha den un forma acelera pa baha edad di pension di biaha di 65 pa 62 aña. Te hasta si ta posibel na 60 aña manera tabata antes prome cu e gabinete Mike Eman a dicidi di subi cu 5 aña mas di un forma gradual pa e fondo di AOV bira solido y garantisa su existencia, segun nan.
Parlamentario Croes a declara cu nan lo ehecuta e decision di baha edad di pension te cu 62 aña den un forma responsabel. “E caminda con nos lo bay hacie den su balansa financiero, dunando e solides di apoyo na loke mester ta di fortifica e fondo di SVB”, el a bisa. Pa haci esaki posibel nan lo evalua con nan lo bay realoca e prioridadnan financiero ‘denter di e desastre financiero cu lamentablemente nos ta heredando’.
Sinembargo el a indica cu den e gobierno nobo di coalicion cu ta bay sinta, nan kier haci ‘tur cos di biaha, pero no tur ora bo por yega Roma di biaha’.
E ta haya cu e decision aki tin un componente social cu ne. Ya cu pa un pueblo cu mayoria di nan ta depende di un salario minimo, ‘bay cu pension ta un derecho sagrado’. Segun sr. Croes edad di pension na 60 aña tabata un derecho adkiri pa nos pueblo fei di basta aña pasa. P’esey nan a opone pa no subi na 65 aña.
