
(AP) – Brazil su gobierno a bisa dialuna cu su agencia di inteligencia a vigila autoridadnan Paraguayo durante e presidencia di Jair Bolsonaro, ken tabata presidente prome cu Luis Inacio Lula da Silva, un decision cu a stop den maart 2023, 3 luna despues di Lula su administracion.
E declaracion di Brasil su ministerio di Exterior a bini oranan despues di un rapport di website di noticia UOL, unda a acusa e administracion di Lula di spionahe riba Paraguay. E ministerio no a detaya e oficialnan Paraguayo specifico cu a cay victima pero a bisa cu e vigilancia a stop “asina cu e administracion actual a haya sa di e hecho.”
“President Lula su administracion categoricamente ta nenga cualkier rol den e accion cu inteligencia a reporta awe contra Paragua, un pais miembro di e bloke di mercado Mercosur cu cual Brazil ta mantene relacionnan historico y un partnership cercano,” Brazil su ministerio di Exterior a declara.
Paraguay su minister di Exterior Ruben Ramirez Lezcano a conta reporteronan na Asuncion dialuna cu e no “tin evidencia cu Brazil a ataca nos sistema.”
Bolsonaro no a haci comentario tocante e caso.
E ministerio tambe a bisa cu director-general actual di su agencia di inteligencia tabata wardando pa confirmacion di Senado den comienso di 2023, ora cu e spionahe tabata activo ainda.
Segun e reportahe di UOL News, agentenan di inteligencia Brasilero a infiltra sistema di computer di Paraguay pa obtene informacion tocante negociacionnan di tarifa relaciona cu e dam hidroelectrico Itaipu, un di esunnan mas grandi na mundo.
Brazil y Paraguay ta comparti e derecho di energia genera na e dam di Itaipu, cual tin un capacidad instala di 14,000 megawatt. Brazil ta cumpra hopi di e energia cu Paraguay ta bende, cual a causa negociacionnan tenso den e añanan recien.
Bolsonaro actualmente ta enfrenta huicio di Brazil su Corte Supremo bao 5 acusacion, incluyendo intento di orkestra un golpe de estado despues cu el a perde eleccion den 2022. E ta enfrenta sentencia y veredicto pendiente den otro casonan tambe dilanti e pais su corte top.