Gobierno Brasileño a para exportacion di gas lacrimogeno pa Venezuela di un empresa cu sede na Rio de Janeiro, debi na e mortonan den e protestanan contra presidente Venezolano, Nicolás Maduro, asina un fuenta cerca di e decision a bisa Reuters.
E decision di embarga e exportacion di como 80.000 bom di gas di e empresa Condor Tecnologias Não-Letais a ser tuma conhuntamente pa e ministerio di Defensa y di Relacion Exterior, ya cu e tipo di benta aki ta depende di e aprobacion di gobierno Brasileño, segun e fuente, cu a pidi pa no ser identifica.
“Gobierno a dicidi honra un peticion di e opositornan pasobra tin un masacre na Venezuela,” e fuente a bisa, cu a agrega cu den e proximo dianan mester tin un reunion den gobierno Brasileño pa discuti e embargo di exportacion di arma letal y no letal pa Venezuela.
E diputado opositor Venezolano Jorge Millán a bisa cu Asamblea Nacional a logra aproba acuerdo cu ta involucra peticion na otro pais pa nan no bende “material pa represion na Venezuela.”
“Nos a descubri cu tabatin tramite avansa pa compra di material na Brasil y nos a haci e denuncia puntualmente.” Jorge Millán a añadi.
“Nos tabatin confirmacion via otro canal (cu nan no lo a permiti e envio di e material,” e diputado a declara. “Nos tin cu gradici gobierno di Brasil,” e a afirma.
E lider opositor Henrique Capriles a celebra e decision di Brasil y a bisa di spera cu otro pais lo sigui e mesun linea.
“Nan a haci absolutamente lo corecto den nenga permiso di salida di esey. Den esaki nos ta cu e otronan; e unico cu ta keda ta parce China,” e ex candidato presidencial a declara.
Durante e ultimo dos lunanan, e adversarionan di e presidente Venezolano a organisa marcha y protesta cu a keda constantemente interumpi pa militar y polis. Memey di e agitacion aki a muri como 71 persona.
