Despues di a reuni cu informador Arie Swaen, lider di partido MEP Evelyn Wever-Croes ta splica cu despues di a ricibi hopi mas informacion cerca e informador, ta mustra cu e situacion financiero di Aruba ta mas serio di loke cu nan a pensa. Esaki debi na e deficit di 175 miyon florin cu tin den e presupuesto 2018 mientras cu di acuerdo cu e ley di CAft, mester tin un surplus di 25 miyon florin pa aña 2018.
“Nos sa cu gobierno di Mike Eman ta violando ley y no a presenta e presupuesto 2018 na Parlamento na tempo. Pero loke nos no tabata sa ta cu tin un deficit di 175 miyon florin den e presupuesto ey, siendo cu segun e ley di CAft cu gabinete Mike Eman mes a bin cu ne, pa 2018 mester tin un surplus di 25 miyon florin. Kiermen, cu pa 2018 nan tin premira 200 miyon mas na gasto cu ta permiti. Esaki naturalmente ta un problema serio, pasobra ta con bo ta bay cera e buraco financiero di 200 miyon pa otro aña?”
Segun e lider di MEP, loke ta haci e situacion mas serio ainda, ta cu pa aña 2017 tambe gabinete Mike Eman a surpasa nan presupuesto, tambe cu sumanan astronomico cu e campaña politico miyonario cu nan a hiba. E ta sigui splica cu e cuenta aki mester wordo presenta ainda na pueblo, ya cu na final di dia, ta e ciudadanonan di pais Aruba mester bai paga pa e gastonan aki. “Naturalmente ta hopi iresponsabel di Mike Eman, Angel Bermudez y henter e gabinete, pa benta e problemanan serio aki awor den scochi di un gobierno nobo. Mas aun, ami ta di opinion cu esaki ta un crimen contra nos comunidad cu nan mester wordo teni responsabel p’e”, ta palabranan expresa pa sra. Wever-Croes.
“Cumpliendo cu deseo di pueblo pa un coalicion, partido MEP lo sigui pone esfuerso den realisa esaki, apesar cu ta un tarea sumamente dificil pa drenta gobierno y soluciona tur e problemanan cu gabinete Mike Eman a crea. Nos ta carga nos responsabilidad pa ofrece Aruba un gobierno integro, transparente, innovativo y cu ta trata finansas publico di nos pais na un forma mas responsabel. Esey tabata nos compromiso cu nos pueblo y nos lo percura pa cumpli cu ne.”
Durante e reunion cu sr. Swaen, acompaña pa presidente di partido MEP Gerrit Croes, sra. Wever-Croes a duna di conoce na sr. Swaen cu partido MEP ta dispuesto pa yega na un coalicion di base amplio; referiendo aki na un coalicion entre partidonan MEP, POR y RED.
