Ayera tardi durante un conferencia di prensa Gabinete AVP-FUTURO a firma un MoU (Memorandum of Understanding) cu Royal Schiphol Group. Prome minister Mike Eman, minister di Turismo, Wendrick Cicilia y minister di Finanzas, Geoffrey Wever y Kjell Kloosterzie, director di Schiphol International, a firma e MoU.

Prome minister Eman a splica cu desde momento di inicio di gobernacion y hasta un tiki prome e gabinete nobo ya a orienta su mes ariba e reto cu durante e periodo di e gobernacion anterior e negociacionnan cu schiphol a drenta un impasse. El a remarca cu nan a haya ta importante tabiel cen Schiphol y asina a inicia e proceso di negociacion di nobo.

El a indica cu como director di Schiphol International, sr. Kloosterzie ta responsabel pa entre otro cu Aruba y hunto cu minister Cicilia, minister Wever y conseheronan a bin ta negocia e ultimo dianan aki pa yega na un acuerdo amplio den forma di un MoU.

E mandatario a splica cu e negociacionnan entre Royal Schiphol Group y AAA lo continua e dianan binidero pa dialoga tocante e detayenan di e acuerdo di schema grandi. “Nos ta hopi contento cu nos a logra haya otro awe. Nos ta mira e colaboracion cu Schiphol como un oportunidad spesial pa sigui desaroya e sostenibilidad di nos aeropuerto y nos ta mira tambe oportunidadnan di crecemento, tanto pa loke ta trata e parti operacional di e aeropuerto, pero tambe pa loke ta trata fortificacion di personal,” el a remarca.

Minister Eman a splica cu tabatin algun desafio cu entre otro, a conduci na un impasse. Un di esakinan, el a sigui splica, tabata e legislacion di LNT, cu a haci’e dificil pa Schiphol nombra un CEO general.

E mandatario a remarca cu den e mercado internacional, personalidadnan cu por eherce un funcion asina y sigur den e forma cu AAA ta maneha un aeropuerto cu tanto pasahero, casi mas cu un miyon, ta un reto grandi pa tene un aeropuerto asina ta funcion sin problema y pa opera na un manera moderno y efectivo.

El a sigui splica cu p’esey tambe ta importante pa tin un partner cu tin hopi experiencia y hopi conocemento, locual ta rekeri tambe un hefe ehecutivo y tambe un CEO cu nan por atrae y cu tin e capacidadnan necesario pa cumpli cu e reto grandi di Aeropuerto Internacional Reina Beatrix.

Minister Eman a sigura cu nan a compromete, despues di bon cooperacion cu minister di

Finanzas, cu nan lo busca un salida den e disposicion di LNT pa asina AAA localmente of internacionalmente por atrae un CEO nobo y na mesun momento tambe habri posibilidad pa

pa compensa e oficialnan principal di miho forma pa Aeropuerto Internacional Reina Beatrix por ta un aeropuerto competitivo.

E di dos punto cu e mandatario a menciona tabata e peticion di Schiphol pa ta mas envolvi den e maneho pa asina nomina un miembro pa e Hunta di Supervision. El a informa cu Gobierno di Aruba y Royal Schiphol Group a yega na palabracion cu Schiphol por postula dos nomber y despues pais Aruba, como e unico accionista ta scoge un miembro for di e dos nombernan nomina pa forma parti di Hunta di Supervision. Den caso cu no ta satisfecho cu e dos nomber, gobierno lo pidi pa nomino otro dos nomber.

E di tres punto, minister Eman a inidca, ta cu nan ta kere ta importante cu for di parti di e accionista sosten fuerte y cla ta ser duna na e gerencia cu lo cuminsa cu e negociacionnan

mas aleu, cu ta tuma over pa gobierno, y tambe pone un liña cla, cual awor tambe ta cla den

e MOU.

Por ultimo, e mandatario a splica cu cu nan a dicidi tambe den conhunto cu nan kier fortalece e relacion entre Royal Schiphol Group y AAA den forma di formacion, tur curso di formacion cu Schiphol ta ofrece, pa asina aki na Aruba tambe por ofrece tanto e top como e personal completo di e aeropuerto pa actualisa y sigura cu tin un operacion fuerte di e aeropuerto. “Nos ta hopi contento cu e momento aki,” el a enfatisa.

El a indica cu minister Cicilia a tene consulta cu Hunta di Supervision y cu e gerencia, nan aporte a ser pidi pa e reunion cu nan a tene ayera y awe e negociacionnan ta sigui den detaye.

“Esaki ta un MOU cu ta stipula e liñanan grandi y compromisonan di Land Aruba como e unico accionista. Pero naturalmente e implementacion di esaki mester ser haci door di e funcionario y representantenan di aeropuerto. Esey ta e maneho di AAA. Y hunto nos ta spera di por saca afo mañan (awe). Siguiendo e combersacion cu minister Cicilia a hiba cu e Hunta di Supervision y tambe cu directiva nos tin tur confiansa cu esaki lo ta hopi exitoso mañan (awe),” el a enfatisa.

E mandatario a agrega cu ademas nan ta haya ta algo hopi special cu Gabinete AVP-FUTURO por a logra un avance den e reto aki den un tempo asina cortico.

Den nomber di Royal Schiphol Group sr. Kloosterzie a expresa cu nan ta hopi contento cu nan colaboracion cu Aeropuerto Internacional Reina Beatrix por continua despues di 20 aña pa asina sigui traha hunto cu tur partner y stakeholders di Aruba riba e exito di e aeropuerto cu nan alogra durante e ultimo 20 aña caba.

“Hopi special pa ta aki, y pa ta aki asina lihe despues di e e inauguracion di e gobierno nobo pa por sigui cu entre otro e negociacionnan detaya tocante e extencion di e cooperacion straetigco. Atrobe, nos ta hopi contento cu nos continua cu e colaboracion entre Schiphol y Aeropuerto di Aruba,” el a finalisa.