For di e rapport cu Promer Ministro a manda pa Parlamento ayera encuanto e avancenan cu tabatin den e consulta cu Hulanda tocante e acuerdo pa defini e condicionnan di reforma, a cambio di ayudo financiero Hulandes, por conclui cu e partidonan ta cerca di un acuerdo final.
E acuerdo aki, na cual posiblemente lo yega diabierna awor, ta encera na promer lugar e dos temanan principal, e ley di Reino di supervision financiero, como reemplazo pa e ley local LAft, y e ley di Reino pa institucion di e organismo di supervision di e reformanan cu lo mester bay tuma lugar. Mirando e diferencianan cu tin riba tereno di supervision financiero lo bin, probablemente, un ley di supervision financiero separa pa Aruba, pero cu den su contenido lo ta casi identico na e ley di Reino di e dos otro islanan y e ley actual Arubano (LAft).
Pa terminacion di e ley si supervision financiero, na su debido tempo, ta meta pa logra: durante 3 aña tras di otro cumpli cu articulo 15 di e ley inclusive un surplus riba presupuesto di minimo 1% y entrega di un cuenta anual aproba pa accountant pa tres aña consecutivo. Tambe un adaptacion di Constitucion di Aruba pa ancra debidamente un equilibrio presupuestario y un norma di 50% como maximo di e corelacion debe/GDP na 2039 y, promer cu termina vigencia di e ley, durante 5 aña consecutivo un reduccion di debe publico efectivo y linear den direccion di 50% pa 2039. Ademas, un reemplazo adecua di CAft pa un organismo Arubano equivalente. Si Aruba ta cumpli cu e requisitonan desde 2026 y desde 2028 tin un organo supervisor cu ta funciona bon y ta actua cu autoridad, tin e posibilidad pa termina e ley di Reino di supervision na 2029. Sin embargo, esey ta significa tambe un fin di fia placa via Hulanda, cu den e forma actual pa e otro islanan y tambe pues pa Aruba, ta sucede riba base continuo.
Pa loke ta e entidad supervisor di reforma no ta detecta cambio grandi. Un cambio menor ta cu ta acepta cu e entidad ta bira ‘Orgaan voor Hervorming en Herstel Aruba (Organismo pa Reforma y Recuperacion Aruba).Hulanda no a bay di acuerdo cu e proposicion pa un ‘voorhangprocedure’ pa consulta cu Staten, loke ta un consulta cu Staten di antemano pa nan sentimento encuanto e proyecto di ley. Ta mantene e texto di e ley manera e ta.
Den e conclusion di e rapport ta remarca cu “aunke por bisa cu e pakete di condicion ta parcialmente ‘overkill’, Aruba na e momento aki no ta capaz di sali riba su propio forza di e pandemia di Covid-19 aki. Hulanda ta bisa por lo demas cu e pakete di condicion ta diseña di tal forma cu e ta haci Aruba mas resistente contra shocknan den futuro. Fuera di esey Aruba lo entama cerca Hulanda mas alivio pa interes cu ta paga riba prestamo den exterior cu ta madura.”
Esaki ta parce di ta un señal cu gran parti di e puntonan ta discuti caba. Mas detaye di e diferente temanan manera edad di pension, dolarisacion, cambio den ley laboral, pa motibo di tempo den nos edicion di mañan.
