Ayera mainta den Parlamento di Aruba a tuma luga e encuentro publico durante cual minister di Asuntonan Economico, Finanzas y Sector Primario Geoffrey Wever, hunto cu representantenan y stakeholders di e gremio comercial, a brinda informacion relaciona cu e desaroyo economico internacional y implicacionnan cu decisionnan den politica Mericano por tin riba economianan chikito manera esun di Aruba.
Minister Wever a splica cu e ultimo simannan nan a bin ta monitor di cerca tur locual ta sucede na Merca, e decisionnan politico y a pidi e expertonan pa monitor esaki y percura pa nan duna nan consehonan, nan splicacion tocante con nan ta wak e situacion y pa presenta tambe posibel solucionnan pa mitiga e riesgonan cu por tin.
El a indica cu gobierno a hiba dialogo cu expertonan di Departamento di Asuntonan Economico, Departamento di Finanzas y Banco Central di Aruba, como tambe gremionan, y a papia cu AHATA, ATIA, CUA, KvK, AFBA, y tur stakeholder cu ta importante pa economia di Aruba, pa asina compronde con nan ta wak e impacto aki, pa nan splica unda nan ta wak e riesgo y tambe pa scucha di nan kico ta posible accionnan pa mitiga e eventual implicacion cu esaki por tin pa Aruba.
Relaciona cu esaki, e mandatario a splica cu siman e tabata full un siman na Washington hunto cu delegacion di Aruba caminda nan a drenta den dialogo cu entre otro IMF, CARTA, World Bank y banconan comercial cu ta presta Aruba placa. El a sigui splica cu nan scucha di nan kico nan ta wak como desaroyo riba mercado Mericano, con nan ta wak e implicacion di e decisionnan politico, ki efecto e por tin pa inflacion, pa interes, pa e poder di compra, pa nivel di prijsnan y stabilidad economico riba nivel internacional.
Minister Wever a remarca cu tin un preocupacion grandi. El a indica cu durante e siman cu e tabata na Washington IMF a ahusta e crecemento economico y a baha esaki pa Caribe, premirando un crecemento economico general di 2%. El a señala cu e organisacion economico ta bisa cu cada reduccion di 1% di crecemento di mercado Mericano ta implica un reduccion di 1.5% pa economianan chikito cu ta depende hopi di turismo y di importacion.
El a subraya cu e importancia di a biahe aki tabata tambe pa scucha entre otro for di IMF, di CARTA y di World Bank con nan ta wak e desaroyo aki pa asina por benchmark e analisis financiero di expertonan di Aruba cu con institutonan financiero internacional ta wak esaki, y tambe pa scucha kico e banconan comercial Mericano ta pensa.
“Naturalmente nos ta preocupa pero tin interesnan grandi financiero y den e caso aki e banconan ta monitor kico e decision aki ta haci pa e mercado di capital y na final di dia bo por benchmark esaki cu efectonan riba poder di compra, pero tambe riba desempleo, riba crecemento economico di economia Mericano cu por traduci su mes pa consecuencianan pa nos economia,” el a indica.
E mandatario a menciona cu nan a identifica varios risico, Banco Central a duna diferente recomendacion riba termino corto, medio y largo, como tambe Departamento di Asuntonan Economico y tur esaki, hunto cu mas informacion amplio y detaya, a ser inclui den un beleidsnota, cual el a splica ainda ta den su prome draft y pronto lo keda concretisa.
Pa loke ta e efecto y/of consecuencianan directo pa Aruba, minister Wever a splica cu economia di Aruba ta importa 50% di tur su productonan for di Merca, loke ta nifica cu si prijs na Merca ta subi, automaticamente prijs di importacion pa Aruba tambe ta subi. El a indica cu pa aworaki e calculacion ta cu lo tin un aumento di prijs di mas o menos 10% cu den su totalidad ta nifica un aumento di 13 miyon florin pa aña.
El a sigui splica cu di e 50% di producto cu Aruba ta for di Merca, 53% ta productonan comestibel. El a remarca cu aunke ta premira un aumento general di 10% riba prijs, pa cuminda y bebida e ta bira un aumento di 2.6%. Cual el a señala ta menos cu e otro productonan si compara cu por ehempel productonan di luho pa cual ta premira un aumento mas drastico.
El a enfatisa cu e cifranan menciona ta calculacionnan cu a ser haci na e momentonan y ta depende di con economia ta bay reacciona riba esaki.
E mandatario a splica cu IMF y World Bank a splica durante reunion di ministernan di Caribe pa keda trankilo, pa no haci nada drastico na e momento aki, percura pa continua cu reformanan structural y keda monitor e situacion di cerca.
“Ningun hende cu nos a topa na Washington tabatin e contesta di kico ta bay sucede. Tur ta calculacionnan y no sa kico e decisionnan politico ta bay ta pasobra nan ta cambia continuamente y tampoco no sa con e mercado ta bay reacciona,” el a bisa.
El a sigui splica cu tin diferente factor cu ta haci dificil pa premira kico ta bira e realidad den e simannan binidero. Pero un aspecto importante ta pa keda trankil, pa keda cu un mensahe consistente y prepara pa cualkier eventualidad. “Esey ta exactamente loke ta inclui den e beleidsnota, cu ta papia di e tipo di medidanan cu Aruba mester tuma. Pa cuminsa mester ta prudente cu maneho financiero, percura pa tin buffers, den caso cu algo sucede y mester monitor e situacion di cerca,” el a agrega.
Di otro banda, minister Wever a indica, un di e factornan di riesgo pa Aruba ta e desaroyo riba mercado financiero mirando cu Aruba ta fia placa riba mercado internacional. El a splica cu e aña aki Aruba mester presta poco mas cu 500 miyon florin pa refinancia su debenan di cual un parti ta ser paga cu surplus y otro parti mester ser presta.
Pa e motibo ey tambe tabatin diferente reunion cu banconan comercial, ya cu Aruba mester subi mercado di capital y e ora ta importante pa un pais manera Aruba tin acceso na capital y e prijs di e capital cu e pais ta bay haya. Dos elemento importante y cu a ser discuti ampliamente cu e banconan comercial na Merca.
Lesa mas di e topico aki den nos siguiente edicion di Bon Dia Aruba.
