Gobierno di Aruba a yama un Conferencia di Prensa riba diaranson, pa duna informacion di un carta cu a ricibi tocante e topico: ‘aanwijzing’. Prome Minister Evelyn Wever – Croes a yama e conferencia aki pa splica comunidad kico ta e situacion y pa no tin motibo di speculacion of motibo di bay den panico.
Diaranson Gobierno di Aruba a ricibi copia di un carta di CAFT cu nan a manda pa Conseho di Minister di Reino den cual nan ta duna conseho pa Aruba haya un ‘aanwijzing’. Segun CAFT, Aruba no a mustra suficiente disponibilidad pa hisa entrada y baha gasto. Prome Minister Wever – Croes a expresa cu esaki ta algo cu a purba di evita pues ta lamenta esaki y no ta di acuerdo cu e ponencianan aki. “No ta prome biaha cu nos ta haya un conseho asina, e ta un procedura normal den e cuadro di supervision. Pero cada biaha cu bo haye e ta bira un momento pa para keto y pone atencion na dje,” Prome Minister Wever – Croes a expresa.
Premier Wever – Croes a reuni inmediatamente cu Secretario di Estado sra. Alexandra van Huffelen y a trata e tema aki. Sra. van Huffelen a indica cu e carta no ta significa cu mesora tin un aanwijzing ta bin. Aruba lo sigui na mesa cu Hulanda (cu CAFT y BZK), y lo sigui cu esfuerso pa evita cu ta bin un aanwijzing.
“E situacion cu ta aden actualmente no ta uno cu mester tin miedo di dje, pues no kier pa ningun ciudadano bay preocupa. Aruba a pasa den cosnan hopi mas pio cu esaki y esaki ta un reto mas cu e Gobierno aki lo atende cu ne cu determinacion”, Prome Minister a enfatisa.
