Libertad di prensa, of libertad di informacion, ta e principio den cual comunicacion y expresion a traves di diferente medio, incluyendo corant, radio y website mester wordo considera un derecho pa eherce di manera liber; e libertad aki ta implica ausencia di interferencia di Estado.

Den un conferencia di ayera diaranson mainta, minister di Husticia y Asuntonan Social Rocco Tjon a presenta un situacion na unda e mandatario a continua cu su decision di no contesta preguntanan di un medio di comunicacion specifico, esta 24ora.

Mesun posicion a ser adkiri pa otro ministernan como Glenbert Croes y Endy Croes algun dia atras. Pa cu esaki periodista di Bon Dia Aruba Andreina Morillo presente den conferencia di prensa aki a haci dos pregunta na minister Tjon, un di nan tabata: Libertad di informacion y prensa na Aruba ta hancra den Aruba su constitucion articulo 1.12, minister Tjon ta haya democratico pa 3 minister di e Gabinete Wever-Croes 2 den bloki a dicidi pa boycott miembronan di prensa?

Pa cu esaki, minister Tjon su contesta tabata: “No, mi no ta boycott miembronan di prensa, absolutamente cu no. Mi ta contesta preguntanan serio di prensa y semper mi ta coopera cu esey, p’esey tur mi documentonan tambe ta habri pa tambe tur hende por wak”.

E di dos pregunta tabata: Mirando cu minister Tjon ta bin for di KPA, unda husticia ta depende riba informacion di pueblo of prensa pa resolve e casonan, instancianan manera VDA y servicio di inteligencia di KPA cu ta yama CID, e ta bon pa democracia of pa husticia si pueblo di Aruba boycott e 2 instancianan aki?

“Obviamente ora bo kier resolve casonan e parti di informacion ta sumamente importante y mi ta kere cu e cuerpo policial ta e instancia pa resolve e casonan, tiplijn ta e manera cu por yega na informacion y p’esey tambe ta haci apelacion na pueblo, si nan tin informacion tocante casonan pa nan por meld esaki pa asina por logra resolve e caso pa e victimanan en cuestion”, el a bisa.

E topico di e conferencia di prensa aki tabata basa den biahe pa Hulanda cu recientemente minister Tjon a haci cu e fin di haci varios acuerdonan di cooperacion, ora minister Tjon a yega Aruba tabatin un ekipo di prensa wardando pa haci preguntanan na minister tocante su biahe, pero mirando cu tabata trata di 24ora, minister a dicidi di no contesta.

“Si e medio di comunicacion ta serio a mi tambe ta tuma nan na serio”, el a bisa.

Marcos Espinoza, periodista di 24ora tambe tabata presente den conferencia aki, unda el a haci un pregunta na minister Tjon – kende a bolbe ripiti cu no lo contesta nan preguntanan, pa motibo cu nan no ta na nivel pa minister contesta 24ora su preguntanan.

Su comentario tabata cu “mescos cu boso ta monitoria a nos, anos ta monitoria e nivel di periodismo di boso y te ainda boso ta bao nivel den mi concepto y mi lo no contesta preguntanan”.

Mirando e situacion delicado aki, periodista di e website Caribisch Netwerk, Sharina Henriquez a dicidi di tuma iniciativa y lanta den un forma di protesta pa bisa minister Tjon cu su persona hunto cu otro periodistanan tin cierto palabracionnan haci den e reunionnan tempo cu gobierno tabata den proceso di formacion, na unda cu el a puntra si e palabracionnan aki ta conoci cerca minister.

Minister Tjon a expresa cu “mi sa cu boso ta reuni constantemente cu minister,” reunionnan cu a tuma luga dos biaha so, caminda a bin dilanti palabracionnan pa loke ta trata informacion cu prensa mester haya di gobierno.

Minister Tjon ta enfoca cu e medio aki no ta haci preguntanan serio unda cu dos siman pasa e mesun periodista di 24ora a puntra tocante situacion di helicopter e cual e no a considera un pregunta serio, pero na final di dia minister Tjon a contradeci su mes ora el a contesta e mesun pregunta cu Henriquez a haci den nomber di Espinoza.

Ademas, el a trece dilanti cu e medio aki no ta duna informacion corecto y nan ta cambia e nomber di e personanan cu ta manda e articulo, segun el a sigura y cu e no a entrega un keho riba esaki.

E decision di minister Tjon por wordo considera como un atentado pa libertad di prensa y libertad di informacion cu no solamente ta hancra den constitucion di Aruba sino cu ta wordo reconoci como un derecho fundamental y internacional, ta kita e posibilidad cu comunidad por haya informacion, cu prensa por haci preguntanan na minister ta parti di un ‘democratische samenleving’.

Loke ta mas preocupante ta cu minister Tjon a sigura cu e ta monitoria trabao di prensa, esaki por mira cu ta masha normal den gobiernonan dictatorial di pasado y presente unda cu un bibo ehempel di esey ta e pais bisiña Venezuela cu nan periodistanan ta wordo persigui y silencia pa motibo cu nan no ta publica loke Estado kier.

Den pasado, na Europa tabata existi un departamento secreto di polis di Estado na unda cu tambe tabata monitoria prensa y nan tabata utilisa metodonan pa identifica y aresta esunnan cu no tabata di acuerdo cu e politica di Estado, na final di dia, e tragedia mas grandi di historia a sosode.

Un otro ehemplo reciente ta e guera entre Rusia cu Ucrania, caminda gobierno di Rusia a censura diferente medionan di comunicacion nacional mientras na e pais tin protestanan contra e guera y nan ta persigui esunnan cu ta opone publicamente na e invasion Ruso.

Ta importante pa destaca cu dia 4 di maart e presidente di Rusia, Vladimir Putin a aproba un ley di “informacion falso” unda gobierno Ruso ta monitoria trabao di prensa, conferencia di prensa di Gobierno di Aruba tin biaha cu periodistanan por haci dos pregunta so y nan mester ta riba e topico specifico di e conferencia.

Pa finalisa, ta bon pa puntra minister Tjon si lo ta un bon idea pa implementa un ley na Aruba manera presidente di Rusia Vladimir Putin a haci dia 4 di maart? di dos pregunta ta, cu cua criterio e ta midi e nivel di prensa? Si ta existi un criterio, ki dia e lo a ser aproba pa conseho di minister? Ta posibel pa comparti esey cu medionan di prensa?