Durante conferencia di prensa ayera mainta, Prome Minister Evelyn Wever-Croes, a anuncia cu e detayenan di e onderlinge regeling, cu ta bay reemplasa e Ley di COHO, a keda finalisa y ta bay firma esaki na Hulanda otro siman.

Prome Minister a remarca cu a yega na un acuerdo cu Hulanda riba loke ta e onderlinge regeling y COHO definitivamente no ta riba mesa mas.

El a recorda cu na comienso di pandemia di COVID-19, e mercado internacional na unda Aruba por a presta placa a cera pa Aruba y pa por a yega na e fondonan necesario pa mantene e pais, Gobierno di Aruba mester a bati na porta di Hulanda.

Hulanda a indica cu nan ta dispuesto pa presta e placa aki, pero a pone condicion y segun Prome Minister a enfatisa, no a keda Aruba otro na e momento ey y a acepta e condicionnan aki di Hulanda. Dos condicion tabata e Ley di COHO y e Ley di Raft. E Ley di COHO a dirigi e relacion entre Hulanda y Aruba pa loke ta e reformanan di recuperacion di Aruba. Y e Ley di Raft a dirigi e supervision financiero na unda cu Hulanda tabata kier a haya mas control mirando cuanto placa Hulanda a presta Aruba.

“Gobierno di Aruba, na e momento dificil aki pa nos pais, a bay di acuerdo y total a haya 916 miyon florin presta di Hulanda durante di e pandemia. A base di esaki, Hulanda a pidi cu pa medio di un Rijkswet, yega na un areglo di Reino y con Aruba lo sali mas fuerte y resiliente despues di e pandemia,” e mandatario a señala.

Prome Minister a subraya cu pa Aruba, e contenido di e reformanan no tabata un problema mirando cu Aruba mes a indica caba cual ta e areanan cu lo mester traha riba dje.

Akinan ta na unda cu e tema di COHO a bin na mesa. Manera ta conoci COHO lo tabata e organo cu lo mester a bin y cu lo mester a consisti di tres persona pa tuma decision den ki area lo bay implementa e reformanan na Aruba. E tres persona aki no lo mester a responsabilisa nan mes ni na Gobierno di Aruba ni na Gobierno di Hulanda.

Prome Minister a remarca cu nan tabatin problema cu e manera con a hinca esaki den otro, pasobra pa gobierno e no tabata un opcion pa pasa decisionnan asina importante den man di tres persona cu Gobierno di Aruba mes no por apunta y no lo tin influencia riba nan. “E tresnan aki lo no ta duna responsabildad na ningun otro hende. A base di esaki, nos a presenta un otro alternativa”.

Na juni aña pasa, e Prome Ministernan di Aruba, Corsou y Sint Maarten a reuni cu Secretario di Estado, Alexandra van Huffelen na unda a negocia, y Aruba a presenta, un otro alternativa cu lo bin na luga di e Ley di COHO, esta e onderlinge regeling.

Na januari di e aña aki a tuma e luga e reunion di e 4 pais di Reino na Sint Maarten, na unda cu e cuater pais a tuma e decision cu e alternativa cu a presenta ta bira e alternativa final cu ta bay reemplasa e Ley di COHO.

Segun Prome Minister a splica, e onderlinge regeling ta un sistema na unda Gobierno di Aruba y Prome Minister cu ta encarga cu e reformanan, ta responsabilisa su mes na Parlamento, e Minister di BZK na Hulanda ta responsabilisa su mes na su Parlamento. Cada ken ta traha hunto cu un ekipo cu ta encarga cu e ehecucion di e landspakketnan y reformanan y ta traha hunto pa yega na palabracionnan.

Onderlinge regeling, un ‘areglo mutuo’, ta un forma di cooperacion describi den articulo 38 di Statuut di Reino banda di e opcion di un ley di Reino, di consenso, cu ta loke COHO mester a bira. Pues ta scoge e otro variante di cooperacion, cu no ta full boluntario pasobra e base ta forma pa e acuerdo encuanto e debe di 915 miyon florin pa cual mester yega na un acuerdo e aña aki. No lo tin un ley, pero igualmente compromiso serio cu e menasa di exigi pago si no ta cumpli cu acuerdo.

Durante e conferencia, Prome Minister no a bay den detaye di kico e onderlinge regeling aki ta encera y segun el a indica, despues cu firma esaki lo informa cual ta e acuerdonan na cual a yega den e onderlinge regeling.

Pa loke ta e otro ley di Reino cu ta riba mesa pa Aruba, Rijkswet Financieel Toezicht, Raft, Prome Minister a remarca cu otro siman tambe nan ta bay trata esaki. El a indica cu Hulanda ta sigui insisti cu esaki ta importante pa nan, pero Parlamento di Aruba di su banda a indica cu nan no ta sostene e Ley di Raft y esaki Aruba ta den negociacion ainda.

Minister di Finanzas, Xiomara Maduro tambe lo biaha pa Hulanda hunto cu e profesionalnan pa e negociacionnan aki pa por culmina esakinan mas pronto cu ta posibel.

Segun Prome Minister a expresa, Raft no ta para riba su mes, e ta combina cu e discusionnan riba e repago di e debe di 916 miyon florin cu Aruba tin cu Hulanda, cu ta caduca e aña aki na october.

“Mirando cu nos no tin e suma aki, nos lo mester yega na un areglo di pago cu Hulanda riba esey y basa riba esaki e reunionnan ta tuma luga. Nos lo mantene comunidad informa riba esaki”, el a indica.