Mientras cu ayera atencion tabata na Parlamento pa e reunion den cual minister di Transporte, Ursell Arends a defende su maneho, particularmente riba traspaso di permiso di taxi, un fuente a confirma pa Bon Dia Aruba cu gobierno ta bay aplica e ley di taxi meter den proximo lunanan.

Esaki pa motibo cu no tin control riba e parti di impuesto, y segun a indica, 20 porciento di taxista tin un debe cu a acumula cu SIAD cu a acumula pa yega na 20 miyon florin.

Ademas, a indica cu actualmente, taxistanan ta haciendo uso di un lista di prijs cu no ta den ley.

Reunion den Parlamento

Diahuebs mainta, Minister di Transporte, Ursell Arends a reuni cu comision di transporte di Parlamento pa splica nan pakico mester a bin cambio riba e sistema inhusto cu a bin ta permiti pa loke ta trata permiso di taxi. Esaki despues cu diaranson anochi, lider di fraccion AVP a entrega un peticion pa yama minister di Transporte cu urgencia pa un reunion den Parlamento.

Na momento di entrega e peticion, AVP a comenta cu ya tabatin un reunion programa ayera mainta di Comision Central di Transporte, pero como cu no tabata programa pa minister di Transporte ta presente, no tabata spera ningun accion concreto pa sali di esaki.

E reunion a tuma lugar ayera mainta, tras di porta cera. Despues di e reunion, minister di Transporte a duna informacion a traves di un comunicado di prensa.

Minister Arends a indica cu durante e reunion, a cuminsa na duna bista ariba e prioridadnan di su maneho di transporte publico cual ta:

Revisacion di Ley y regulacion den beneficio di Integridad y Seguridad;

Accesibel y pagabel;

Sostenibilidad di transporte.

E esencia di e cambio di maneho di transporte publico, manera ya a bin ta splica na diferente ocasion, ta pa move den e direccion di oportunidad igual unda cada ciudadano por yega na remarca pa un permiso di taxi. Manera ya a menciona, e sistema actual ta operando den un ‘closed system’ unda tin limite di cuanto permiso tin y cu ta keda draai den e mesun grupo. Asina impediendo por ehempel otro ciudadano y tambe hulpchauffeur nan yega na un permiso di taxi paso simplemente no tin niun disponibel. Hulpchaffeur nan ta keda un grupo vulnerabel ya cu door di e sistema existente ta permiti cu nan ta wordo explota door di e vergunninghouder.

A comparti cu parlamento e biahanan cu a tene dialogo cu taxistanan y tambe a duna di conoce cu desde comienso e taxistanan a wordo informa door di e minister cu e maneho di transporte lo wordo haci conforme ley. Cual tur dos decreto ministerial y esun adicional cu lo sali ta, esta conforme ley.

Den ultimo dialogo cu taxistanan, e asociacion di taxista a trece proposicionnan dilanti cu minister Arends a duna di conoce cu tabata puntonan valido y e lo sigur considera den e di tres decreto ministerial.

Minister Arends ta keda para pa oportunidad igual, unda cu tur Arubiano mester por tin e oportunidad husto pa obtene un permiso di taxi. “Nos ta purbando di restaura e integridad di e sistema di transporte publico, y esaki a mustra di a trapa riba un ader principal di politica tradicional,” e minister a menciona.

Parlamento a ricibi amplio informacion y argumento riba e cambio di maneho di transporte publico unda cu e mayoria ta di acuerdo cu mester a bin un cambio. Esaki ta mustra cu nos ta den bon direccion pa berdaderamente trece cambio den sistemanan gubernamental cu tin riesgo di no ta integro y asina opera for di un sistema limpi di corupcion, segun minister Arends a indica den e comunicado.

Problema den gobierno?

Riba su pagina di Facebook, lider di fraccion MAS, Marisol Tromp a comparti un video dunando comentario na medionan di comunicacion local prome cu e reunion den Parlamento. Den esaki, el a dirigi su critica na prome minister Evelyn Wever-Croes como dirigente di gobierno. “Eigenlijk bo tin un situacion caminda minister president (…) e tin un situacion unda e kier ta bon cu diabel y bon cu Dios,” el a bisa.

Lopez Tromp a nota cu tabatin protesta di taxista contra maneho di minister di Transporte, y cu den esaki por a mira “claramente cu tin un division den gobierno.” Esaki pasobra “MEP como partido” a publica cu nan ta sostene e taxistanan. “Nos a wak esaki door di minister di Husticia, Rocco Tjon, nos a wak esaki door di minister (di Salud y Turismo) Dangui Oduber, y nos a wak minister president a keda keto prome. Y tambe como MEP, diferente parlamentario a ataca e minister en cuestion.”

Sinembargo, Tromp a nota cu algun dia despues, “minister presidente ta sali y haci comosifuera cu e ta sostene e minister aki, el a declara esaki recientemente. E ta haya cu e minister tin bon puntonan valido, e ta haya cu e ta di acuerdo cu loke a trece padilanti, y alabes nos sa cu nan tin un problema den gobierno.”

Tromp ta punta riba e situacion unda na mes momento cu e grupo di taxista tin reunionnan andando cu minister di Transporte tocante su maneho pa purba di yega na un acuerdo, cu abogadonan presente, y awo tin reunion den Parlamento pa haya informacion, “y minister presidente eigenlijk tin un situacion cu bo ta yama un ‘onwerkbare situatie.’ Nan no tin un unidad den maneho den nan gobierno.” Esaki ta proba, segun Tromp, den e hecho cu diferente minister a expresa un diferencia di opinion den maneho. “Ora bo tin un situacion asina, eigenlijk, of bo ta manda e minister cas, of bo ta sosten’e, dos cos tin. No por ta dividi. Pasobra gobierno mester tin un solo maneho riba e [tema] aki.”

“Ami ta conclui politicamente, loke mi ta mira, cu minister Ursell Arends tin algo riba MEP, e tin algo riba minister president cu su gobierno. Diripiente nan a cambia di voz, nan a cambia di opinion. Den un solo gobierno bo mester tin un beleid. Y nos no ta wak cu tin un beleid.”

Pero segun Tromp, mester resolve e problema aki den Conseho di Minister, ya cu na momento cu un decreto ministerial ta toca otro ministerionan – cu den e caso aki ta entre otro, Economia y Turismo, e lo mester a keda trata den Conseho di Minister.

Durante un conferencia di prensa un siman atras, a puntra prome minister tocante e situacion di maneho nobo pa taxista, pa cual el a indica cu den e contenido di e argumentonan cu minister Arends a splica Conseho di Minister, tin puntonan hopi valido, y el a resalta cu for di su punto di bista, e ta sigur cu den dialogo e taxistanan tambe lo compronde.

“Ta puntonan cu nos tur kier pa mehoracion di Aruba y mi ta sigur cu ningun hende ta bay pidi e minister haci algo cu ta contra ley, haci algo cu ta contra integridad. Nos sigur no como gobierno, pero e taxistanan tampoco. Mi a papia cu e minister, mi a papia cu e taxistanan y pa loke ami ta sinti, nan no ta hopi leu di otro,” el a remarca.

Apart di reuni cu minister Arends, e representantenan di taxista a reuni cu prome minister, minister di Turismo, Dangui Oduber, y minister di Finanzas, Xiomara Maduro. Prome minister a indica caba anteriormente cu e no ta bay mete den maneho of cartera di otro minister.