Manera ta conoci, Corte di Prome Instancia riba 28 di augustus 2024 a dicta un sentencia na fabor di Stichting Algemeen Pensioenfonds Aruba (APFA), den e caso entama pa APFA contra Gobierno di Aruba.
APFA a cuminsa un caso contra Gobierno pasobra nan no ta di acuerdo cu Gobierno a introduci un ley, e Landsverordening Normering Topinkomens (LNT), den cual ta impone un maximo di salario na e directornan di entidadnan di Gobierno. E ley ta stipula cu salario di directornan no por ta mas halto cu 130% salario di Minister President.
Hues den prome instancia a dicta cu Gobierno no por aplica e ley di LNT pa APFA. Y pues cu no tin limite na e salario di e director di APFA. Gobierno di Aruba no ta di acuerdo cu e sentencia di hues, y lo apela e decision.
Na aña 2022, Gobierno a pasa un ley na unda ta pone un salario maximo pa directornan di e companianan y institutonan di Gobierno. E motibo pa cu esaki ta, cu tin varios compania estatal y/of instituto na unda e directornan ta gana salario di 3 à 4 biaha mas hopi cu salario di ministernan, sin tin e mesun responsabilidad di un mandatario.
A base di esaki, mirando cu ta institutonan di/pa Gobierno, a introduci loke ta yama e Wever-Croes norm, cu ta un maximo di 130% di e salario di e ministernan. Varios instituto no a bay di acuerdo cu e ley aki, y a opta pa entama un caso contra Gobierno di Aruba, di cual nan a haya rason siman pasa. Gobierno no ta di auerdo cu esaki, y lo apela e decision y evaluacionnan haci door di hues, y lo pone esaki na evaluacion di Corte di Husticia den cual 3 hues independiente lo reevalua e caso.
For di 2022 caba gobierno a expresa su posicion firme riba e tema, indicando cu “Gobierno di Aruba a constata cu tin directornan di cierto companianan estatal ta cobra un salario hopi halto. Prome Minister a enfatisa cu scuchando e reaccion di pueblo cu mientras prijs di awa y coriente ta subi, no ta husto cu salarionan di directornan ta asina halto. Pa e motibo aki tambe, a bin cu e ley aki cu ya Sint Maarten y Hulanda tin caba pa stimula un maximo pa e ‘top functionarissen’, cu ta e directornan of ‘higher management’ di un compania.”
Durante un conferencia di prensa na 2022, Prome Minister a presenta un tabel indicando e sumanan di salario di 12 instituto semi publico. Por nota e salario mas abou ta 249 mil florin pa aña y esun mas halto ta 694 mil florin pa aña pa e directornan. Esaki ta mas o menos 40 pa 50 mil florin pa luna cu ta 5 biaha mas halto cu un salario di un minister. Ademas, Prome Minister a enfatisa cu e ley aki ta importante pasobra e tabata un di e condicionnan cu Hulanda a pone tempo di pandemia, ora gobierno di Aruba a pidi sosten di likides.
