Cu sumo placer Fundacion Museo Arubano, cohuntamente cu Aruba Tourism Authority y Gobierno di Aruba ta anuncia cu recientemente a cuminsa cu e prome Bon Bini Festival na Fort Zoutman situa den Oranjestad.
E festival aki desde su comienso na 1985 (47 ana pasa) a sa di ofrece un plataforma balioso pa asina tin interaccion cultural pa bishitantenan local y turista. Durante cada show di Bon Bini Festival por experiencia nos historia, gastronomia, musica, baile y folklore cu ta wordo presenta den un forma di celebracion.
Pa Fundacion Museo Arubano ta un honor pa por presenta Bon Bini Festival un biaha mas desde cu mester a limita nos operacionan di trabou pa motibo e pandemia pa e ultimo 2 ananan.
E peticion pa bin bek cu e show ganador di e “ Trip Advisor Award” di parti diferente partners, comunidad y turista tabata impresionante. Un danki ta bay na tur pesona cu ta forma parti di e team pa hasi esaki posibel. Especialmente e artistanan cu a sa di impresiona e publico presente.
Nos ta invita pueblo di Aruba pa sigui e facebook page di Bon Bini Festival pa asina wak e fechanan cu lo presenta e grandioso Bon Bini Festival. E luna aki lo tin Bon Bini Festival riba 1 di november y 8 di november. Entrada lo tin costo pa localnan y pa turistanan.
