‘Gobierno di Aruba a pidi Hulanda espacio pa yega na un surplus financiero’

Gobierno di Aruba a pidi Hulanda un espacio pa yega na un plan cu Aruba por carga, ya cu segun e ley di CAft, e aña aki Aruba mester tin un surplus riba presupuesto di 25 miyon florin.

Segun un relato emiti pa gobierno di Aruba, no ta algo desconoci cu e gobierno di gabinete Wever-Croes a haya un situacion financiero di Pais Aruba bastante malo laga atras pa e gobierno saliente. E relato ta splica cu e cifranan real ta mustra un deficit di 170 miyon florin. Esaki ta un diferencia di 195 miyon cu ta mustra imposibel of dificil pa yega na e surplus cu e ley ta permiti.

Prome minister Evelyn Wever-Croes (MEP) a elabora ariba esaki bisando cu ‘una bes cu gobierno a wordo confronta cu e cifranan real cu nada of no mucho por wordo cambia na nan mas, a keda nos e opcion pa dicidi pa acudi cerca Hulanda pa pidi un espacio pa asina por presenta un plan alternativo con nos por yega na un termino mas largo pa yega na e surplus financiero’. E intencion ta cu den e plan aki lo presenta e pakete di decisionnan cu ta wordo haci pa baha gastonan di gobierno, pa aumenta entradanan di gobierno y crea espacio pa inverti den desaroyo economico, den cuido di salud, den enseñansa, den combati problemanan social entre otro cosnan cu mester haya atencion di gobierno.

E relato ta sigui splica cu esaki ta un plan cu gobierno ta trahando riba dje y unabes esaki keda cla, lo bay Hulanda pa yega na un compromiso y of acuerdo cu gobierno di Hulanda pa asina, aunke cu esaki no ta den e cuadro di e ley di CAft, nan permiti gobierno di Aruba un poco mas tempo pa bin ‘back on track’, sabiendo cu awo aki pais Aruba no ta den e direccion corecto teniendo un deficit asina halto.

“E fecha di e biahe pa Hulanda no ta conoci ainda pero si tin palabracionnan cu pa fin di luna lo informa CAFT riba e plan aki pero e deseo ta keda pa prome cu esaki discuti’e cu gobierno di Hulanda teniendo na cuenta e supervision financiero cu Aruba ta aden desde 2014 cu a haya CAFT, no por tuma e tipo di decisionnan aki mas sin consulta y haya aprobacion di Hulanda y ohala cu e espacio cu Hulanda duna nos por ta suficiente pa sanea e situacion financiero.”