Siman pasa e organisacion di pensionadonan OPPA a perde un caso cu nan a cuminsa contra Gobierno. Nan a exigi na prome luga cu Gobierno cumpli cu e promesa cu Mike Eman a haci na nan memey den eleccion 2017, na augustus 2017.
Segun un comunicado di prensa, “Eman a priminti nan cu nan lo cobra e gelijk bedrag. Pero Eman no a cumpli cu su palabra y no a laga placa atras pa cumpli cu esaki. Hues a dicta cu Eman no tabata autorisa pa haci e promesa ey y cu e promesa tabata uno ilegal y cu Eman a manipula pensionadonan.
Tambe pensionadonan a pidi hues pa paga nan e gelijk bedrag pasobra nan tin derecho riba dje, pero riba esey tambe hues a bisa cu no ta e caso. Si den pasado Gobierno a paga e suma ey, tabata manera un regalo y no un derecho manera pensionadonan a claim.
Por bisa cu e veredicto aki ta demostra un biaha mas con falso Mike Eman ta como lider, cu e no tin gevoel y hasta cu sentimentonan di pensionado el a hunga. Mike Eman nunca mas merece confiansa di ningun pensionado”, e comunicado ta termina.
