Despues cu ayera a ricibi noticia for di Venezuela indicando a confirma nan boluntad pa traha hunto riba e reapertura gradual entre Venezuela y e partinan Caribense di Reino Hulandes, gobierno di Aruba den un comunicado di prensa a aclaria cu e negociacionnan en berdad no a cuminsa ainda.
“E situacion rond di e apertura di frontera cu Venezuela ta mescos cu di lunanan anterior. Actualmente ta den espera pa sinta na mesa cu Venezuela pa por cuminsa cu deliberacion. Ya ta hibando combersacion di esaki pero e negociacionnan no a inicia ainda.
“Manera cu ta conoci Aruba y Reino Hulandes ta para pa un reapertura di e frontera tuma luga den fase, cuminsando cu e frontera maritimo. Pero prome cu yega na esaki mester tin palabracion concreto. E combersacionnan pa yega na e palabracionnan aki ainda no a inicia,” e comunicado ta indica.
