Manera anuncia mediante un conferencia di prensa entre Gobierno di Aruba y 7 sindicato na luna di april ultimo, despues cu a negocia e pago di indexering den dos parti, e luna aki empleadonan publico lo ricibi e prome parti di indexering cu ta representa 6% di e compensacion, di 11.7% total.
Ayera atardi, Gobierno di Aruba a informa cu despues cu Presupuesto Complementario a keda aproba den Parlamento, awor nan tin e mandato pa cumpli cu e pagonan di indexering pa empleadonan publico.
Na april di e aña aki, Gobierno y sindicatonan SADA, Simar, SPA, Seppa, FTA, Simba, y TOPA a yega na un acuerdo pa indexering di sueldo di empleadonan publico y ‘gelijkgestelden’ cu for di 2019 tabata pendiente. Nan a splica cu a basa esaki den e cifranan di inflacion di e periodo di 2018 te cu aña 2023. E cifra di inflacion ta basa den un promedio anual indice di indice prijs di consumo di e periodo aki, cu tabata di 16.8%.
Durante añanan, inflacion a hunga un papel importante den e poder di compra di tur ciudadano, y aunke Aruba a conoce un inflacion mas abao cu resto di mundo y region, e tabatin su efecto. Por nota si cu e inflacion ta bahando cada aña, y pa otro aña e lo ta bao di 2%. No por kita si, cu si tuma tur e añanan anterior den consideracion, e efecto negativo riba e poder di compra di cada ciudadano ta grandi. Segun gobierno a indica, pa por fortifica e forsa di compra, gobierno a presenta e nota di cambio na Parlamento.
E cifra cu a logra acorda entre Gobierno y sindicatonan pa pago di indexering ta di 11.7% di e perdida di forsa di compra den salarionan di empleadonan publico pa periodo di 2018 te cu 2023 e cual ta bay pag’e di e siguiente manera:
1) Entrante 1 di Juli 2024 ta aumenta salario di empleadonan publico y gelijkgestelden cu 6%.
2) Entrante 1 di Januari 2025 ta aumenta salario di empleadonan publico y gelijkgestelden cu 5.7%.
3) E primanan lo keda na 6,387 florin anualmente.
Esaki ta un lucha cu sindicatonan ta bin hibando for di varios aña. Na januari di e aña aki, mediante un conferencia di prensa, vocero di e sindicatonan Edward Maduro di SADA a señala cu na 2019 sindicatonan a cuminsa negociacionnan cu Gobierno di Aruba riba indexering riba aña 2018; esaki ta den cuadro di cumplimento di Bilateraal Akkoord Indexeringsoverleg cu a firma na 2014.
“Lamentablemente nos tin cu bisa cu na 2019 nos no a logra finalisa e discusionnan rond di e tema aki, mirando cu varios reunion a tuma luga, e tempo ey. Fin di october 2019 nos a haya un propuesta di parti di gobierno pa locual sindicatonan y miembronan a rechasa esaki rotundamente, ya cu esaki tabata un falta di respet den nos concepto e tempo ey. Lamentablemente ora cu 2020 a habri, pandemia a dal y esaki a pone cu tur e discusionnan a bay on hold,” Maduro a sigura.
E tempo ey, nan a enfatisa cu nan ta traha conforme uitvoering bilateraal akkord di 2014, na unda gobierno y sindicato a firma un acuerdo unda lo mester a cuminsa cu e topico di indexering 1 di januari 2019. Gobierno e tempo ey mester a zorg pa un comision traha riba un indexeringmechanisme unda cu lo a bay evita tur discusion of problema en cuanto e topico di indexering pa futuro. “Cu lo mester bin na un manera automatico cu si acaso tin inflacion den añanan anterior, esaki lo ser compensa pa e perdida di forsa di compra. Pero gobiernonan tabata ‘dejado’ y esaki no a tuma luga. Pa e motibo ey nos a informa gobierno na 2019 cu tanten cu nos no logra yega na un acuerdo pa locual ta trata inflacion cu tabatin na 2018, nos no ta bay forma parti di niun comision, pasobra gobierno a faya e funcionarionan publico,” Maduro a bisa e tempo ey.
Ademas, el a splica cu e topico aki tabata involucra cifranan basta halto, cu tabata surpasa 10% di inflacion di tur e añanan den total. Nan tabata spera pa e cifranan di 2023 yega na 15% di inflacion total, y na final a acorda 11.7%.
Finalmente, no ta un secreto cu costo di bida ta birando mas caro unda inflacion ta afecta tur trahado, incluyendo esnan den aparato publico, loke ta pone cu ta necesario ahusta salario pa asina nan por sigui contribui na economia di pais Aruba. “E mesun ahuste aki ta bay di un of otro manera den nos economia y mi ta kere cu ora nos a plantia esaki na gobierno, despues di reunionnan hopi profesional cu nivel di respet pa otro, a compronde e dolor cu empleado publico tabata pasa aden. Anos ta wak tur dia cerca nos miembronan y mi ta kere esey ta hopi importante pa tene cuenta cune, pasobra nos ta e horea y e bos di empleado publico. A pesar cu gobierno tin e rol di maneha e pais, pero tambe tin e rol di ta dunado di trabao y mester duna un bon ehemplo pa e otronan tambe pa por wak den ki direccion con nan ta trata cu empleado publico,” Maduro a bisa.
Pa nan como sindicato esaki tabata un “acuerdo historico” unda empleadonan publico por confia den nan directivanan cu ta haciendo un trabou profesional na mesa sin cu mester a yega na e recurso mas drastico.
