Den weekend cu a pasa nos Prome Minister, Evelyn Wever-Croes a expresa e preocupacion grandi di Gobierno di Aruba pa cu e medida di Presidente Maduro, esta pa cera frontera pa trafico di y pa entre Aruba y Corsou pa 72 ora. Gobierno di Aruba ta den contacto cu autoridadnan di Venezuela pa trece solucion na e situacion aki. Tambe tin contact cu Hulanda y Corsou.
Prome Minister Wever-Croes a duna di conoce cu desde diabierna anochi Gobierno di Aruba ta den evaluacion constante cu Buitenlandse Zaken di Hulanda como tambe cu su homologo premier di Corsou, sr. Ruggenaath pa asina ta riba un linea.
Riba e situacion aki, Prome Minister ta informa e pueblo di Aruba bisando: “A traves di e canalnan oficial di Reino nos ta den contacto cu autoridadnan di Venezuela pa mira con por soluciona e situacion. Gobierno di Aruba ta dirigiendo tur atencion caba na atende cu e problema di contrabando, cu ta e motibo di e decision di presidente Maduro. Reino y Aruba ta reconoce e preocupacionnan di Venezuela riba contrabando. Pa cua motibo tambe nos kier tene un linea habri di comunicacion. Y mi kier ta bastante enfatico riba esaki, si tin ilegalidad nan cu ta tumando luga, nan mester wordo combati. Y e intencion di Reino y Aruba ta pa haci esaki den cooperacion cu Venezuela. Na e momento aki nos gobierno nobo ta haciendo tur lo posibel pa combati e contrabando cu tin. Manera Minister di Husticia a anuncia, entre otro lo intensifica control na nos costanan y cu e helicopter lo wordo treci bek, pa haci Aruba mas sigur y pa combati actonan ilegal na nos costanan.”
E mandatario a splica cu gobierno di Aruba a institui un comision special pa atende cu e tema di contrabando; ya nan a cuminsa traha riba esaki y lo intensifica e trabounan den curso di awe pa asina nos por purba uza e resultado di esaki pa nos yega na un solucion pa e situacion aki.
Entre Venezuela y Aruba tin lasonan hopi estrecho economicamente, familiar y cultural y pa e motibonan aki e medida aki pa cera e frontera cu Venezuela ta afecta nos hopi, segun sra. Wever-Croes
“Gobierno di Aruba y Reino lo sigui den dialogo cu Venezuela pa yega na un solucion di e situacion aki mas pronto posibel”, minister president di Aruba a bisa.
