Ayera minister di Asuntonan Economico, Comunicacion y Desaroyo Sostenibel a informa cu e sistema cu Aruba tin pa importa carni for di Colombia, por ehemplo, cu ta por lo menos 30% mas economico, mester tin cierto testnan y trabao cu tin cu haci pa por logra.
Pa contesta e pregunta di reportero di Bon Dia Aruba, minister Geoffrey Wever a bisa cu den pasado esaki a wordo haci caba y despues esey a wordo para. Awor segun minister Wever a informa cu pa algun simannan nan ta bin tumando back e tema hustamente pa haci un contra efecto na e aumento di costo di bida y “gobierno a enfoca cu ta bay busca manera pa importa carni, den caso aki di Colombia”. “Ayera tabatin un reunion entre tur e departamento cu diferente ministernan pa explora y wak con por bin cu un plan di accion pa haci esey. Tin den preparacion di un trade mission pa Colombia, unda cu esey tambe lo ta riba agenda y otro siman director di departamento di Asuntonan Economico tin un biahe di trabao pa Bogota”.
Esaki tin atencion di gobierno, manera el a declara, na unda manera el a enfatisa: “Ta haciendo nos maximo esfuerso y poniendo empeño pa purba di alivia unda cu nos por, pa den caso aki e efecto cu e tin riba poder economico. Pero e no ta facil, pasobra hopi cosnan no ta den nos man y e cambionan aki basicamente bo ta logra na termino largo. Aworaki, diripiente bo ta haya bo cu e crisisnan aki cu ta tuma su tempo pa por logra e cambionan, pero tur esnan cu ta den nos control nos ta bezig ta tackel caba”.
Igualmente, esaki ta conta pa produccion local tambe na unda minister Wever a anuncia cu nan ta preparando diferente programa pa acelera y stimula produccion local. Por ehemplo, di berdura, pero esaki no ta un topico cu ta nobo y cu di awe pa mañan no por logra esey. Pero esaki tambe tin atencion di gobierno.
