Ayera Gobierno di Aruba a organisa un actividad pa celebra Dia Mundial di Prensa. Ariba dia 1 di september ta celebra internacionalmente Dia Mundial di Prensa y pa conmemora e fecha special aki, Gobierno di Aruba a organisa un actividad special pa gradici miembronan di prensa di Aruba.
A traves di un comunicado di prensa Prome Minister, Evelyn Wever-Croes, a indica cu relaciona cu Dia Mundial di Prensa dia 1 di September, Gobierno di Aruba a organisa un encuentro cu prensa di Aruba como gradicimento pa e trabaonan incansabel cu nan ta eherce den comunidad. Esaki a tuma luga ayera diadomingo 3 di September na e edificio di FUTURA.
Durante e encuentro aki ministernan di Gabinete Wever-Croes a bisti uniforma cu e mensahe “Danki Prensa” riba nan T-shirt pa asina demostra na tur miembro di prensa e respet y gradicimento cu gobierno tin pa miembronan di prensa cu ta trece informacionnan corecto pa pueblo.
Miembronan di prensa cu tabata presente di varios medio di comunicacion tabata entre otro, Top FM, TeleAruba, Nos Mainta, Diario, Mas FM, Bon Dia Aruba, Acceso Total, Bo Informado, Aruba Native y Noticia Impacto.
Durante e encuentro, a haci competencianan di grupo, entre otro Seso sport/ kibra coco y Mimica na unda cu e grupo ganado a ricibi nan premio y despues a sigui cu un almuerso pa e invitadonan special di e dia.
Na final di e encuentro e mandatarionan presente a hiba palabra pa gradici cada miembro di prensa pa nan trabou. Na mesun momento a haci un reconocimento special na Sr. Hubert Thiel cu ta e miembro di prensa cu mas a asisti na conferencianan di prensa di Gobierno di Aruba.
Den nomber di Gobierno di Aruba Prome Minister Wever-Croes a gradici miembronan di prensa pa acepta e invitacion di gobierno pa asisti na e actividad aki como tambe pa tur trabou cu nan ta haci, no solamente pa trece e mensahe di Gobierno den pueblo sino tambe pa informa pueblo cu tur otro informacion necesario pa fortalece e pais y proteha e libertad di expresion.
Dia Mundial di Prensa no solamente ta un dia pa reconoce e trabao di prensa rond mundo, pero pa reconoce tambe e importancia e libertad di prensa, un instrumento di comunidad. No solamente pa nan ta bon informa, sino pa canalisa y busca cierto contesta riba nan inkietudnan y preocupacionnan. Esaki a keda demostra durante e incertidumbre cu tabata biba den comunidad den tempo di pandemia, durante cual temporada prensa a keda traha incansablemente pa mantene pueblo di Aruba informa durante un temporada di tanto temor, incertidumbre y inkietud.
