Diaranson 28 di Augustus, 2024 ta un dia importante y grandi pa loke ta trata e ciclo financiero di pais Aruba. E presupuesto 2025 a wordo firma pa ministernan y ta na caminda pa wordo entrega na Parlamento. Segun ley e presupuesto mester wordo entrega prome of mas tarda 1 di September di cada aña. Mirando cu e fecha ta cay riba un fin di siman e aña aki, Minister di Finanzas a pone e presupuesto como prioridad pa caba cune y entreg’e na Parlamento prome cu e fecha di 1 di September.
Prome Minister a indica den un comunicado di prensa cu na momento cu Gabinete Wever-Croes a drenta gobernacion na aña 2017, tabata tin hopi reto pa loke ta e situacion financiero di pais Aruba. Presupuestonan tabata wordo entrega tin biaha 6 luna despues cu aña cuminsa y ya e presupuesto a wordo gasta. A tarda poco, pero ya pa un par di aña e presupuesto ta wordo entrega na tempo, y e aña aki hasta prome manera ley ta prescribi.
Segun e comunicado, importante den e presupuesto aki ta cu Gobierno a cumpli cu tur e normanan financiero cu a wordo palabra cu Hulanda y a wordo hancra den ley. E presupuesto ta wordo entrega cu un surplus cu ta cumpli cu e minimo di 1%, e ta dentro di e gastonan di personal, y cu esaki ta bahando e debe di pais Aruba. E presupuesto ta brinda tambe posibilidad pa mas inversion, y tin espacio pa inverti den poder di compra di e ciudadanonan.
Segun e comunicado, Aruba ta bayendo den un rumbo hopi positivo, finanzas ta na orden, economia ta creciendo, turismo ta bayendo bon, y desempleo y inflacion ta bahando. E meta di Gobierno ta pa traduci e progreso aki den bienestar di cada ciudadano di pais Aruba.
