Diabierna, gobierno di Aruba a tuma nota di declaracion di vice presidente Venezolano, kende a indica cu Venezuela a dicidi di habri frontera cu Aruba y a menciona cu no lo habri frontera cu Corsou y Boneiro.
Pero durante oranan di diabierna atardi, gobierno di Aruba a ricibi e notificacion oficial di Gobierno di Venezuela cu nan a habri e frontera entre Venezuela y Aruba.
Prome minister Evelyn Wever-Croes a expresa cu e decision aki a cay como un sorpresa pa gobierno di Aruba y ta poco straño, dicon Aruba si, y Boneiro y Corsou no.
“Mesora nos a bay den consulta interno, cu embahada di Reino na Caracas y cu Hulanda, pa por haya un confirmacion di locual a wordo declara na television. Mirando cu ta trata di un tema asina delicado, cu hopi consecuencia, nos como un gobierno, no por actua a base di un declaracion na television. Nos ta wardando pues confirmacion di gobierno di Venezuela pa despues nos fiha nos propio pasonan”, asina e mandatario a duna di conoce.
Prome minister a indica cu mientras tanto e situacion ta keda mescos, avion ni boto por bin for di Venezuela. Y mirando e situacion di crisis sin precedente cu e pais bisiña ta pasando den dje cu un aumento di migracion cu por tin efectonan pa cu orden publico y siguridad di Aruba, den interes general, a decreta cu Aruba ta cera frontera cu Venezuela pa un periodo di un (1) luna.
