Gobierno di Aruba a cumpli su menasa di boicotia e Comite di Conmemoracion di Pasado di Sclavitud. Otro luna, na momento cu e comite keda presenta oficialmente, esaki ta bay tuma lugar sin un representante di Aruba.

Esaki segun un articulo di portal noticiero, Dossier Koninkrijkrelaties. Segun e articulo, motibo di e boycott ta cu Gabinete Wever-Croes II ta expresando su disgusto pa e tasa di interes cu Hulanda a impone riba e prestamo tempo di pandemia di Covid.

Manera ta conoci, Aruba ta pagando un tasa di interes mas halto cu Corsou y Sint Maarten, pasobra a nenga di introduci un Ley di Reino riba Supervision Financiero (Rijkswet). E tasa di interes ta bay baha unabes cu entrega e ley na Parlamento.

Comite di Conmemoracion di Pasado di Sclavitud
 Por recorda cu na 2023, durante un discurso na un evento di Genootschap Nederland-Aruba, minister di Finanzas, Xiomara Maduro (MEP) a critica loke e ta considera e actitud ‘colonista’ di Hulanda. El a remarca cu e supervision financiero na Aruba no ta den discusion, esaki ta existi desde 2015 y ta hancra den e Ordenansa Nacional di Supervision Financiero Temporal di Aruba (LAft). E no a adresa e hecho cu Hulanda no ta satisfecho cu e supervision financiero den un ley local, LAft, ya cu den pasado a yega di resulta problematico caba, y cu Hulanda ta negociando pa pone al menos algun aspecto di supervision financiero den un ley di Reino, RAft.

Loke ta den discusion, Maduro a indica, ta e ‘strafrente,’ e interes halto di 6.9%, ariba e prestamo di COVID-19 cu Hulanda a duna e pueblo di Aruba pa e asistencia cu a wordo solicita conforme Articulo 36 di Statuut.

E tempo aya, Maduro ta resalta cu e ta sorprendi cu Hulanda, a traves di Ministerio di Relacion Exterior a impone un interes asina halto pa Aruba y tambe cu nan ta pone presion pa un acuerdo predetermina y usa menasa como medio di presion pa firma e acuerdo di refinanciamento.

El a subraya cu tal trato pa un solicitud di ayudo dentro di Reino, den e aña di conmemoracion di historia di sclavitud, no merece ningun premio y no por wordo splica di un bon manera den ningun idioma.

“Hulanda no por di un banda disculpa pa e historia di sclavitud y di otro banda impone un ‘strafrente’ pa Aruba balora na mas di 300 miyon florin (150 miyon euro) cu e ta gana cu e sufrimento di e pueblo di Aruba durante e pandemia. E accion aki di Hulanda ta refleha un practica colonial, ora cu mester a saca probecho di e colonianan,” Maduro a enfatisa.

E mandatario ta remarca cu Hulanda ta ofrece disculpa pa accion- y practicanan cu no ta sucede mas y Estado Hulandes a pidi disculpa pa e historia di e sclavitud y haci yamado pa investiga e impacto di esaki den presente.

El a agrega cu algo di auto-reflexion, e ekipo di negociacion y Secretario di Estado (di e tempo aya, Alexandra van Huffelen) por a wak cu e caminda y loke ta wordo negocia, e presion cu ta wordo eherci, e menasa di un incumplimento pa Aruba y e imposicion di un ‘strafrente’ di 300 miyon di florin pa e poblacion di Aruba di un prestamo pa afronta un pandemia no ta contemporaneo, pero ta hopi similar cu accionnan den e pasado colonial Hulandes.

Na final di e discurso, minister Maduro a informa na esnan presente cu Ministerio di Finanzas y Cultura lo no forma parti mas di e agenda pa conmemora e abolicion di sclavitud den Reino Hulandes. “Ta para tur trabou ‘tot nader orde’ y e motibo principal pa esaki ta e manera di trata cu otro den e negociacionnan pa refinancia e debe di e pandemia, y e ‘strafrente’ di 300 miyon florin cu e pueblo di Aruba ta haya pa paga pa un yudansa basa riba articulo 36 di statuut.”

Despues di discurso di minister di Cultura Xiomara Maduro, e peticion pa sigui participa den e proceso di negociacion of deliberacion over di e gobernacion pa haya fondonan pa proyectonan na Aruba ta continua.

Den un entrevista cu Bon Dia Aruba e tempo aya, Luc Alofs ken ta miembro di un plataforma cu ta yama Interinsulair Overleg tocante e pasado di sclavitud cu a ser lanta despues di e rapport den cual a skirbi tur e recomendacion pa cu Gobierno Hulandes na aña 2021, el a bisa cu nan a ripara cu aunke Gobierno Hulandes a pidi diferente colaboradornan na islanan pa por organisa dialogonan riba nan isla pa por duna imput na e rapport, esey a tuma luga na tur isla perteneciente na Reino Hulandes, menos Aruba.

Na momento cu Aruba a retira su mes for di e trayectorio cu tabata andando, e consecuencia di mas grandi tabata cu Hulanda a invita e islanan Caribense ex-Antias Hulandes pa forma comisionnan cu un representante di gobierno y un di comunidad, pa conhuntamente yega na un decision di con nan ta bay sigui cu e proceso, con nan ta bay organisa e fondo cu ta disponibel.

Hulanda a pone disponibel un fondo di 200 miyon euro. Na november na Sint Marteen, Gobierno Hulandes a avisa cu e placa ta bay wordo parti den tres parti: 66 miyon euro ta keda na Hulanda pa e descendientenan y publico en general, 66 miyon euro ta bay na Surinam y 66 miyon euro ta bay na e islanan, unda cu a traves di desaroyo di proyecto, e islanan ta haya fondonan y e grupo Interinsulair tabata hopi contento cu esey.

Sinembargo, maske e tempo aya ainda no tabata defini con lo goberna e placa, Alofs a bisa cu Gobierno di Aruba no tabata den proceso di negociacion riba esaki. Pero si cu fundacionnan participando den e proyecto di Conmemoracion di Sclavitud na Aruba tabatin otro fuente pa ricibi fondo, manera entre otro, Mondriaanfonds y Cultuurparticipatie.

Prome ronda di subsidio ta den preparacion
 Mientras tanto, Dossier Koninkrijkrelaties a informa cu e representantenan di e otro islanan cu ta bay join e Comite di Conmemoracion ta bay keda anuncia dia 27 di januari proximo, durante un presentacion. Tareanan di e comite ta inclui aumenta conocemento y conscientisacion tocante e pasado di sclavitud. E miembronan prospectivo di e comite ya a participa den un siman di trabao na Corsou, sin cu tabatin un representante di Aruba. E Comite di Conmemoracion ta bay conta cu sosten di un organisacion di trabao cu oficina na tanto Hulanda Europeo como e parti Caribense di Reino.

Pa e iniciativanan social riba e seis isla, e gabinete anterior a aloca un total di 33 miyon euro. Den spring, ta bay tene sesionnan di informacion pa informa potencial aplicante riba e proceso.