Gobierno di Aruba a yega di informa cu nan ta den deliberacion cu e gremionan riba con nan por yuda, pero tambe kico lo bira un fiansa pa nan, igualmente e condicionnan di dje pa atende e crisis di e coronavirus/Covid-19 cu a ocasiona un impacto socioeconomico den nos pais.

Recientemente gremionan empresarial a yega di reacciona negativamente riba e presupuesto adapta 2020, cu ta contene e plan di emergencia pa salvaguardia Aruba financieramente den e actual crisis. Igualmente Camara di Comercio (KvK) a demanda di gobierno pa bin cu cambio y asina flexibilisa nos ley laboral pa atende e desafionan cu nan negoshinan ta pasando aden pa e falta di actividad economico.

Contrario na loke tabata aspiracion di pais Aruba di haya un donacion di Hulanda via fondo di ayudo di Union Europeo, y otro parti via credito den mercado internacional, ya caba premier Wever-Croes a yega di bisa cu e donacion aki no ta posibel. “Ta bay presta si, pero no duna,” el a declara. Esaki kiermen cu e fondo di emergencia economico/social cu pais Aruba ta buscando di 1.3 biyon florin lo ta un fiansa y no un donacion.

Tambe ta conoci internacionalmente e descontento cu a produci e posicion di Hulanda pa medio di su minister di Finanzas, Wopke Hoekstra kende su comentarionan a genera un division entre e paisnan di e bloke Norte di Europa y esunnan di e bloke Sur.

Segun prome minister, ya caba gobierno di Aruba a yega di vocifera cu no ta di acuerdo cu Hulanda su posicion. “Nos a pone un banda, pasobra nos ta buscando solucion,” el a bisa den su declaracion di diabierna anochi ultimo.

E mandatario a declara cu e posicion di gobierno di Aruba ta cu nan ta buscando tur forma posibel pa yega na e fondonan cu nan mester yega pa bringa cu e virus aki, y su plamamento y tur e gastonan cu tin envolvi. Tambe pa percura cu tin fondo pa yuda esnan cu a perde empleo pa medio di FASE (Fondo di Asistencia Social Economico).

Gobierno kier destina parti di e fondo di emergencia pa yuda comerciantenan y companianan chikito y mediano cu no por wanta e golpi cu e situacion di crisis aki a trece cune. Nan ta representa mas cu un 90% di comercio di nos pais. Sinembargo minister Xiomara Maduro a yega di informa cu e suma di yudansa y hasta e forma cu gobierno lo por brinda yudansa na comercio na e momento aki ta depende di e yudansa di Reino.

Igualmente cu e fondo di emergencia aki lo permiti pa gobierno por dispone di placa pa asina nan por reconstrui nos economia y nos pais bek y asina atende cu e crisis cu e Covid-19 a ocasiona na Aruba.