Mirando cu Gabinete Wever-Croes a entrega su retiro dialuna ultimo y a bira un gobierno demisionario, varios plan a keda memey di ehecucion, specificamente na districto di San Nicolas unda recientemente a bin informando loke ta trata e revitalisacion di mainstreet.

Pa esaki, ayera 11 di september prome minister Evelyn Wever-Croes a manda un comunicado indicando cu nan a reuni cu e directiva di San Nicolas Business Association (SNBA) pa trata proyectonan den ehecucion.

Gobierno ta reuni riba base regular cu diferente stakeholder y San Nicolas Business Association ta un stakeholder importante mirando e proyectonan den planificacion y den ehecucion na San Nicolas. Durante e reunion SNBA a trece algun punto di importancia pa dilanti riba proyectonan andando y tambe a manifesta nan preocupacion y interes riba e status di e proyectonan mirando cu Gobierno ta demisionario.

Un gobierno demisionario si por sigui atende “lopende zaken” of casonan y proyectonan coriente. Esey ta significa cu proyectonan cu ya a cuminsa hunto cu SNBA prome cu gobierno a bira demisionario, por continua.

Bon Dia Aruba den su edicion di 26 di augutus a informa cu SNBA a identifica Revenue Centers pa trek negoshinan na San Nicolas. Errol de Freitas, presidente di San Nicolas Business Asociation (SNBA) a duna un declaracion na unda a trece dilanti e desaroyonan cu ta bin tumando luga den lunanan aki na San Nicolas, entre otro, e proyecto di revitalisacion di mainstreet di San Nicolas.

E fase 1 di e proyecto unda a kita asfalt y a pone klinkers for di Van de Veen Zeppenfeldstraat te cu Charlie’s Bar a keda cla, awor e y di dos fase ta bay ta te caya di Paulus Potterstraat.

Tambe ta bay pone parkeo na banda cu iluminacion segun DOW mes a anuncia e cual ta bay tin un duracion di 50 dia di trabou pa lo cual de Freitas a duna su gradicimento y tambe a señala cu e ta spera cu esaki por keda cla prome cu luna di december. “Pasobra e trabou aki tin hopi aña den pipeline.”

Den e vision cu SNBA ta bin entregando Gobierno di Aruba e cual nan a traha cu nan durante e ultimo 6 aña, segun de Freitas, aworaki ta den proceso pa asina mira kico a ser haci y no laga algun puntonan afo pa nan por ser ehecuta manera el a sigura den su discurso durante e apertura di e Job Center di Hotel Secret’s Baby Beach.

“Mi tin cu bisa cu mi ta hopi orguyoso di estadistica di e cantidad di hendenan cu a bay aplica na Secret’s” unda el a afirma cu ta casi 500 persona a aplica y cu e idea tras di esaki ta pa hendenan local aplica y esey ta sucediendo.

Den e vision aki pa San Nicolas, manera De freitas a indica, ta bay haya full un cambio di e cay bayendo straight na Carnaval Village y nan a identifica lo cual nan ta yama ‘Revenue Centers’ e cual ta e luganan cu ta bay trek negoshi pa pariba di brug.

Loke nan ta sperando di e negoshinan y di nan miembronan ta cu ta ripara e oportunidad cu tin den esaki, e tipo di negoshi cu mester ta prepara pe, “e ta algo mas gastronomico, nos ta weita cu Secret’s no a explota lo cual ta full e beverages. Nan a tene nan palabra cu shopping lo sucede aki bou, p’esey e avenida bayendo pa Colony por haci e distancia mas corto y importante,” De Freitas a sigura.

Ademas, el a trece dilanti e situacion cu Hickinson Hotel na unda el a manda un mensahe na e doñonan di e hotel aki pa tuma un decision, si ta bay desaroy’e, bend’e of entreg’e.

Di mesun manera, dia 2 di september ultimo a anuncia un otro proyecto cu lo inclui e creacion di un mercado local, destina pa sirbi como un atraccion nobo pa bishitantenan y un plataforma vital pa nos agricultor y productor local. E Sunrise Market lo ta situa den e parkeerplaats actual di Arubus, y lo inclui espacio dedica pa no solamente artesania, pero tambe pa productonan local cu hopi di nan a anhela pa asina nan por bende den un forma mas consistente y accesibel. E proyecto aki ta den man di ministerio di Ursell Arends y Geoffrey Wever.

Di e parti di Colony, pa varios biaha caba el a trece dilanti e topico di Santana di Cacho unda De Freitas a informa cu el a reuni cu Departamento di Salud Publico y Directie Natuur en Milieu (DNM) den caso aki “pero ta parce cu ta cierto cosnan so nan ta sali afo pa critica of pa haci desordo, nos tin cu actua cu nan, no solamente pa e turistanan, pero nos mes, si bo wak e condicion unda nos tin potretnan y video, ta mustra cu ta birando pio.”

El a haci un apelacion na esnan cu recientemente kier dera nan bestia eynan pa “please busca un crematorio di bestia y asina yuda den situacion aki.”

Lo cual ta e beach di Baby Beach, De Freitas a menciona cu un di e critica mas grandi cu e ta haya ta cu e beach ta bay ser tapa, nan a bin papiando di e tema aki hunto cu Gobierno di Aruba, caminda el a sigura cu nan ta tumando e caso aki na serio “pero mi ta kere cu despues di hopi deliberacion nan a compronde kico nos kiermen, awor nos tin cu zorg pa ehecuta e pida ey.”