Durante e conferencia di prensa semanal di partido MEP, e politico Dangui Oduber a dirigi su mes na plannan presenta door di Aruba Ports Authority (APA), unda cu lo kier desaroya e area. Segun e politico, ni director di APA ni e minister demisionario di infrastructura tin autoridad pa mara e gobierno nobo na decisionnan cu ta wordo tuma den e periodo aki cu e gobierno actual ta saliendo.
Diripiente partido AVP por tur cos, mientras cu nan tabata tin 8 anja pa haci esaki segun sr. Oduber. “Loke nan ta bay laga atras ta un desaster financiero. Nan ta laga un atras un presupuesto cu mester a wordo entrega 1 di september, cual tin un deficit di 200 miyon florin mientras segun e ley di CAft e presupuesto aki mester a conta cu un surplus di 25 miyon florin.” Sr. Oduber ta sigui splica cu apesar cu e pais a wordo laga den un situacion
di deterorio, un situacion di desaster, nan ta e cambio cu pueblo a pidi pe y nan lo asumi e responsabilidad aki pero ta bon pa recorda pueblo kico MEP ta heredando di e gobierno di AVP na momento cu nan drenta gobierno. Oduber ta bisa cu pueblo a vota pa cambio y kier mira un gobierno nobo cu ta traha di un forma transparente y responsabel financieramente. Pa e motibo ey, un gobierno cu vision diferente, cu solucion y di cambio no por ehecuta un plan di ultimo ora di un gobierno anterior paso no ta esey pueblo a vota pe.
E politico ta expresa cu ta importante pa pone un paro riba e decisionnan cu ta wordo tuma na e momento aki pa desaroyo di APA ya cu esaki mester wordo consulta prome cu e gobierno nobo. “Ken a bisa cu e gobierno nobo ta di acuerdo cu tur e plannan cu APA N.V. a presenta?”, sr. Oduber ta bisa. Tambe sr. Oduber ta bisa di kier manda un señal pa tur director y tambe na e gobierno demisionario, cu e gobierno nobo ta na caminda y
asina esaki ta cla y e gobierno nobo ta uno legitimo, “tur decision cu a wordo tuma cu e gobierno nobo no ta di acuerdo cu ne, lo wordo aboli y wordo ingetrokken.”
E masterplan di APA a wordo presenta durante e Cruise Symposium Aruba ta encera den desaroya e 20 hectar di tereno na waf di Oranjestad; ta propone pa 40% ta destina
como parke y areanan berde, 10% ta espacio publico pa cana, sinta y move y 50% lo ta propiedad inmobiliario cu diferente uzo.
