Gobierno ta trahando riba legalisacion di cannabis of marihuana pa uzo medicinal.
Premier di Aruba, Evelyn Wever-Croes (MEP) a bisa cu su gobierno ta limita nan mes riba uzo medicinal y no recreativo. E ta convenci cu riba uzo medicinal di cannabis ‘tur hende ta para su tras’.
Den e proceso di formacion di e gobierno di coalicion aki (MEP-POR-RED) nan a yega na e palabracion cu legalisa uzo di cannabis recreativo cu tabata un deseo di partido RED, no ta negociabel of no ta wordo poni riba mesa mes. Pero si e legalisacion di cannabis medicinal y nan a cuminsa traha riba dje.
El a referi na e sufrimento cu su ruman cu a fayece a pasa aden pa motibo di cancer, y e uzo di producto medicinal a base di cannabis a duna su ruman alivio. “Kico bo kier haci pa bo ser keri na e ultimo momento ey, mi ta kere tur hende ta haci esaki.” Segun e mandatario, aki na Aruba tin hendenan cu ta gasta hopi placa uzando azeta sin tin garantia riba e producto aki, y e ta considera importante pa brinda proteccion na e grupo aki tambe.
Legalisacion y cultivo
El a bisa cu pa legalisa e uzo di cannabis tin diferente pasonan cu mester tuma prome cu nan por bin cla. Pa e motibo aki tin un grupo di preparacion legal cu ta trahando caba na servicio di gobierno. Nan ta esunnan cu a cuminsa documenta riba legalisacion di cannabis su uzo medicinal den otro paisnan. Te ainda gobierno no a haya un conseho for di nan, ya cu apenas nan a cuminsa.
Recientemente cu prome minister a presenta pa atende e situacion di refineria den parlamento, el a confronta e pregunta kico gobierno tin pensa pa genera entrada, mirando cu Citgo a bin cu un slow down. Nan ta pensando riba diferente desaroyo pa genera actividad economico riba nos isla. E ta aclaria cu parlamentario, Ricardo Croes (RED) ta esun cu a bin cu e sugerencia si gobierno a considera cultivo di cannabis como otro pilar economico.
Ta asina cu minister di sector primario, Chris Romero ta trahando riba plan di agricultura actualmente. Unabes cu gobierno ta yega na e conclusion cu e uzo medicinal di cannabis ta wordo legalisa, nan lo por evalua si lo mester importa tur e productonan cu tin di haber cu cannabis. Of e otro opcion lo ta cu Aruba mes por produci, pero bou e condicion ‘extremadamente stricto’ pa e producto cu meta medicinal y den area hopi isola.
