Ayera diamars, minister di Salud di Chile, Enrique Paris a bisa su ciudadanonan cu si nan no respeta cuarentena e medidanan lo bira mas fuerte, pa via di e aumento di casonan di coronavirus cu e region capital ta sigui experimenta.
“Si e hende no ta compronde pa via di rason, obviamente nos lo tin cu aplica mas forsa”, e minister a afirma den un entrevista cu un emisora di radio local.
E region Metropolitano, den cual e capital ta ubica, ta esun di mas afecta pa e pandemia den e pais, cu alrededor di 150.000 caso di coronavirus di e aproximadamente 180.000 na henter e pais y cu casi 3.000 persona fayecido di e 3.400 cu a wordo registra na nivel nacional.
Desde un luna pasa, Santiago de Chile y e zona rond di dje tin un cuarentena total pa trata di ‘flatten the curve’ cu a subi na luna di mei, luna den cual e aislamento tabata decreta pa algun bario- of sectornan so.
Sinembargo, e circulacion di personanan no a reduci manera autoridadnan tabata spera y den un encuesta reciente a bisa cu 72% di e Santiaguino a afirma cu a sali riba caya durante cuarentena, aunke 80% di nan a pidi permiso prome.
Pa via di e falta di resultado di e medidanan, desde e laboratorio di ideanan di Espacio Publico a recomenda cu Santiago lo drenta den ‘aislamento’ y hacie manera ‘un ciudad drumi’.
Di esaki, Paris ayera a bisa cu lo mantene un reunion cu Eduardo Engel, director di Espacio Publico, ‘pa intercambia datonan, informacion, y scucha su punto di bista’.
No obstante, Paris a señala cu decision di ‘ aislamento’ no ta coresponde pa su persona, sino cu esey tin cu haci hunto cu otro autoridadnan y bao guia di presidente Sebastian Piñera.
