Ministro di Interior y Husticia di Venezuela, Néstor Reverol, a informa ayera cu 40.000 hoben lo por solicita pa forma parti di e forsanan di seguridad di estado, entre polis nacional y polis militarisa, dentro di e asina yama ‘Plan Chamba Juvenil’ activa dia 20 di juni.
“Ya nos tin preinscribi 19.410 hoben; homber y muhe cu a dicidi di incorpora den Polis Nacional Bolivariano (PNB),” Reverol a bisa na e canal estatal VTV,desde Universidad Nacional Experimental di Seguridad (Unes), na Caracas, unda el a sigura cu ayera dialuna tabatin 176 hoben presentando pa examen di admision.
Reverol a splica cu e personanan cua pre-inscribi lo pasa pa e diferente fasenan di e proceso di admision pa logra di ta parti di e cuerpo di seguridad, den cual, asina el a destaca, nan mester cumpli e rekisitonan fisico y psikico necesario.
“Ya nos tin, apto pa drenta na luna di augustus venidero, 2.884 futuro oficial di Polis Nacional Bolivariano y nos ta spera cu na augustus ta drenta 6.000 mas,” el a agrega.
E 40.000 puestonan vacantes ta dividi den 20.000 pa PNB y otro 20.000 pa ‘Guardia del Pueblo’, institucion anexo na Guardia Nacional Bolivariano (GNB, polis militarisa).
E proceso aki di captacion di funcionario pa e forsanan di seguridad di estado ta den cuadro di e Plan Chamba (trabao) Juvenil, activa dia 20 di juni ultimo, pa presidente Venezolano, Nicolás Maduro, cu e meta di ofrece cupo di trabao y estudio na e hobennan entre 15 y 35 aña cu a saca nan carnet di patria.
E iniciativa ta pretende genera alrededor di 200.000 empleo atraves di empresa inicia di parti di hobennan o como prestador di servicio den empresa y institucionnan publico y priva.
