Diabierna ultimo gobierno a trek in e permiso di operacion pa un parke di molina na Urirama y lo reevalua pa establece esaki na un luga alternativo leu di areanan habita.
Ayera mainta durante un conferencia di prensa minister di husticia Andin Bikker (POR), a trece e noticia aki mirando cu si a sigui cu e plannan aki e habitantenan di e area no lo por a biba den paz dia pa dia. E habitantenan aki a protesta tambe den pasado ‘pero gobernacion saliente no a atende cu e preocupacionnan aki pa 8 aña largo’.
Ademas di esaki e minister a indica cu nan a stop trabounan tumando luga na Sero Cristal cu tabata operando sin permiso. E minister a splica cu esaki ta parti di accionnan cu nan lo ta hibando dilanti rond henter Aruba pa para operacionnan cu ta operando sin permiso (hindervergunning).
Pa e proximo simannan lo ta mirando -segun sr. Bikker- si por yega na acuerdo na un otro luga ‘cu ta menos habita’, unda lo por establece e parke aki conhuntamente cu Windpark Urirama NV.
E mesun situacion na Sero Cristal a conduci e minister pa cuminsa delinea un maneho nobo, despues cu e companianan cu tabata operando na e area aki a bay corte ora e minister a emiti decretonan contra procesamento di material ilegalmente. Actualmente hues a dicta na fabor di gobierno pa loke ta trata e caso aki.
Su maneho nobo lo bay tene cuenta tambe cu e parti di desaroyo, mirando cu ‘bo mester di e materia prima aki pa construccion en general y di un caminda e tin cu bin’. Pero lo balansa esaki cu leynan di naturalesa y e hinderverordening. “E maneho aki nos lo bay anuncia pronto.”
