Un conocedo di nos sistema politico hopi aña pasa a bisa e palabranan aki cu ta mantene nan balor te awe: “No ta presion di pafo ta haci e wea di presion rementa, ta esun di paden.” Den e dianan aki ta bon pa recorda e palabranan aki, ora nos observa e pleitonan den gobierno cu a cuminsa sali afo. Aña a habri cu e incidente den reunion di conseho di ministro cu a haci cu ministro di Turismo a bay cerca Gobernador pa keha y condiciona su posicion. Finalmente e coleganan a haci bon y a lubida e famoso carta di nuebe punto cu cual mester a cumpli. Nada no a cambia, manera nos por a ripara algun dia pasa, ora cu mescos cu nos como ciudadano, ministro di Turismo tambe a haya sa cu tin un tereno grandi dilanti Divi Phoenix cu su colega di Infrastructura a duna caba na un desaroyado. Otro hotel nobo mas cu e no tabata sa nada al respecto. E biaha aki, asina leu cu nos sa, su ‘fuse no a bula’ y el a acepta e noticia cu cierto resignacion. Un muestra mas cu despues di tur e ‘si no fono’, el a acepta e consecuencia di su escogencia pa keda den e partido berde, pasobra probablemente e no ta mira tanto futuro den su propio partido. Comentario di den e partido berde ta bisa cu bao di risa di su coleganan e mester a acepta di keda, y di awor en adelante mester mantene su mes mas trankil tambe.
Pero no a dura mucho prome cu e siguiente atake a bin, atrobe un asunto interno cu a rementa bin afo: e asunto di e logo y relaciona cu esey e asunto di companianan cu si o no ta propiedad di e ministro. Ta parce cu e asunto aki tambe ta bay termina den silencio. Esaki a pesar cu e partido opositor grandi a dicidi di hiba e asunto pa investigacion na Ministerio Publico. No cu esey ta garantia pa exito, ya cu te awe nos no ta logra haya un Procurador General cu e curashi pa bisa e ministro di Husticia pa e ‘back off’ y atende su mes asunto y laga e Procurador dirigi OM. Nos historia di 30 aña di Status Aparte ta dorna cu incidente unda e ministronan di turno ta kere cu ta nan mes ta Procurador.
Cu esey no necesariamente ta asina nos por a mira na nos hermana isla Curaçao, unda dentro di mesun sistema legal a haci uzo di tur facultad y poder cu tin pa investiga un Prome Ministro corupto, cu hasta a bay asina leu di entrega informacion di servicio nacional di inteligencia na tercera persona. Unda cu na 1994 Reino no a basila na Aruba pa bati e ministro di Husticia di e tempo ey riba su man, Reino a faya pa actua y despues a haci un intento pa corta paso di e ex Premier, si acaso e tabatin pensa di bolbe como mandatario. Na Aruba nos ta mira un panorama diferente, unda OM ni sikiera ta cuminsa cu un investigacion preliminar, pa wak si tin algo castigabel pa ley a sucede. Y di e par di biaha cu OM a mustra curashi, manera den e caso di aresto di Carvajal, ta Hulanda mes ta esun cu ta pone interes di Shell y otro compania grandi Hulandes na Venezuela na prome luga, y ta percura pa e sali liber, lagando e aliado Mericano cu a pidi su aresto, y OM na Aruba den ridiculo. Asina nos por mira cu cada ken semper ta actua segun nan mes interes y no segun logica manera anos simpel ciudadano ta pensa. Asina ta cu di e banda ey lo nos keda asombra si algun dia nos por aplaudi algo positivo di nos Ministerio Publico, cu pa hopi di nos aparentemente basta tempo caba a perde dos letter den e palabra ‘ministerio’. Pero, ban keda optimista, cualkier dia cos por drecha.
Mientras tanto, nos por puntra nos mes ta dicon e atakenan continuo aki di paden contra e ministro, cu hasta segun contrincante politico ta hopi activo, aunke no necesariamente nan mester ta di acuerdo cun’e. Pero compara cu con e letargico colega di Husticia ta presta, ta di comprende cu e ministro di Turismo (y Cultura) ta haya amplio oportunidad pa briya. Por ta cu esakinan ta e prome señalnan di busca posicion caba pa eleccion otro aña? Talbes ta necesario pa purba kita poco briyo for di e ministro aki, pa su rivalnan directo por drecha nan record? Pasobra ni esun di Infrastructura, ni esun encarga cu Asunto Economico tin tanto exito di anuncia pa hustifica nan posicion como ‘kroonprins’ di partido. Esun prome a haya su mes den diferente scandal relaciona cu emision di tereno, y e otro despues di su ‘hazaña’ di hedging awor ta lidiando cu e reapertura di refineria, cu ta dunando mas pregunta cu e ta capaz y/o dispuesto pa contesta. Ta parce cu e asunto aki no a calma ainda y nos ta pendiente pa e siguiente episodio.
