Gobierno Argentino a presenta medida nobo pa mehora control di inmigracion

Gobierno di Argentina a implementa un medida nobo pa aumenta e control di inmigracion na pais aki. Rogelio Frigerio, ministro di interior a presenta un sistema nobo, unda gobierno ta exigi aerolineanan pa recopila informacion tocante tur pasahero cu ta drenta of sali for di Argentina.

E sistema di informacion anticipa di pasahero (API) ta busca pa sa si un persona cu a drenta of sali for di Argentina ta busca of no pa  husticia local of di su pais di origen. Frigerio a presenta e sistema API durante un conferencia di prensa na Direccion Nacional de Migracion Argentina hunto cu Horacio José García, kende ta esun responsabel pa e area aki. El a confirma cu sistema nobo a cuminsa di diahuebs cu a pasa. Pasaheronan mester duna aerolinea su nomber completo, sexo, fecha di nacemento, nacionalidad, pais di residencia, fecha di vencemento y pais cu a duna paspoort hunto cu adres di destino.

E informacion aki ta compara hunto cu un sistema di informacion di Interpol y pa autoridadnan di Argentina, cu obhetivo di identifica caso di stranhero cu por tin un orden di captura na Argentina of otro pais. E norma no ta aplica pa ciudadanonan Argentino, residente permanente legal of residente stranhero. E medida ta wordo uza na varios pais rond mundo manera Canada, Merca, Spaña, Mexico, Francia, Hapon y Brasil.

Frigerio a bisa cu e meta ta pa pura y mehora tur tramite di inmigracion, pero tambe tin informacion exacto di tur persona cu ta drenta of sali di e pais”, “nos tin cu habri e porta pa tur persona cu haci bon, pero no pa delincuentenan, nos no kier delincuentenan aki.”

E ministro a indica cu ora cu autoridad por detecta un pasahero cu tin antecedente cu husticia, y nan comunica cu autoridad di pais cu ta busca e persona aki y nan ta lo dicidi kico ta bay pasa cu e persona ey.

Tambe a comunica tocante e procedura na momento cu autoridad mester manda un pasahero bek, si por detecta algun situacion hudicial iregular, y el a bisa “nos ta purba di papia cu e aerolinea cu a transporta e pasahero aki, sin un prome revision di su documento y sin mira e antecedentenan, anto nan mester hib’e bek pa su pais di origen. ”