A pesar cu prome minister, Evelyn Wever-Croes (MEP) a cualifica como positivo e reunion cu gobierno a sostene cu representantenan di Citgo, toch e tin su reserva riba locual a wordo priminti.

Sinembargo e echo cu verbalmente e situacion di e refineria na San Nicolas lo sigui manera tabata prome cu a wordo declara e status di slow down, ta trece trankilidad, ya cu e trahadonan no lo wordo despedi. “Nos ta bek den e situacion prome cu e slow down”, segun e mandatario.

Pero e ta reconoce cu hasta prome cu Citgo a papia di bay den slow down ya caba e trabou tabata bayendo hopi slow. Citgo a bisa cu a menos nan tin e fondo pa sigui cu e mesun ritmo di trabou cu tabata tumando prome cu e slow down. Kiermen no tin argumento manera nan a yega di insinua pa kita e trahadonan cu tin den e refineria actualmente.

E mandatario a laga sa cu gobierno a pone como condicion pa Citgo cuminsa cumpli cu e pagonan atrasa. Entre nan esunnan di e contratistanan cu no por a cumpli cabalmente cu e pago di nan trahadonan, ya cu Citgo no a cumpli cu nan pago.

Problema di financiamento
Sinembargo den e reunion cu nan a sostene hunto cu henter e directiva di Refineria di Aruba (RdA), representante di Citgo a resalta un positivismo y optimismo cu nan lo yega cumpli cu nan parti di e acuerdo, te hasta na tempo.

Nan a anuncia cierto cambio den nan structura pa re start e refineria. Pero tambe nan ta buscando cambio den e forma di haya financiamento cu a keda pega pa medio di e sancion cu Merca a bin contra Venezuela. Esaki a afecta nos, ya cu Citgo cu a huur for di RdA e refineria di pais Aruba, ta aparece cu PDVSA ta e compania principal of matriz di nan. Den un structura asina, Merca su embargo ta afecta Citgo pa haya financiamento. Tin pa ehempel Citgo Houston cu no ta cay bou PDVSA, y e compania aki si ta haya excepcion for di Merca. Pero ta dificil pa bin cu e cambio di structura aki. Esaki ta den esencia e situacion, ya cu Citgo mester di un financiamento grandi cu ainda no ta cla pa inverti den e refineria na San Nicolas.

E echo cu nan no a haya financiamento ainda ta pone e panorama skeptico, ya cu e placa grandi no a drenta. Ainda mester haci inversion substancial y necesario pa pone e refineria den operacion bek.

Den sintesis, dos punto importante di e reunion cu gobierno a sostene cu Citgo tin di haber cu e trahadonan no ta bay perde nan trabou mas. E di dos ta cu awor si gobierno di coalicion (MEP-POR-RED) por a establece un linea habri di comunicacion cu Citgo, mirando e situacion interno cu nan mes a pasando aden.