Gobierno actuando contra constitucion

E anuncio di gobierno cu e ministro encarga cu entre otro labor a dicidi di ‘hala un banda’ y cu Conseho di Ministro ta bay di acuerdo pa apunta un ministro cu ta keda encarga cu su tareanan ‘tot nader order’ a lanta basta discusion. Partidonan den oposicion ta di opinion cu e forma di procede aki no ta corecto y cu e ta eherce su funcion, o e mester renuncia. Y como cu e ministro tin cu responsabilisa su mes dilanti parlamento, ta corecto cu e asunto merece un debate den parlamento, aunke e presidente no lo cumpli, atrobe.

E pregunta lo ta di biaha, ken tin rason y kico ta bon o malo na e manera cu Conseho di Ministro a actua. E prome paso ta pa revisa loke nos Constitucion (Staatsregeling) ta bisa. Esaki ta duna un formulacion cortico di e relacion cu parlamento. Articulo II.1 inciso 3: “E ministronan ta responsabel na Staten.” Nada mas. Pero e frase cortico aki tin un splicacion un poco mas amplio den e Memorie van Toelichting:” Den e tercer inciso ta pone e base pa e responsabilidad politico di e ministronan. Cada ministro ta responsabel individualmente pa su actonan – por ehemplo demostra pa e ‘contrasigne’ (refrendo, contrafirma; red) di decreto – como tambe pa su eventual negligencia. E principio basico no ta kita cu e gabinete por haci e responsabilidad di un ministro e responsabilidad colectivo di tur ministro. Por menasa cu retiro di henter e gabinete, si un di su miembronan ta confronta cu un mocion di desconfiansa. Un gabinete por dicidi por ehemplo pa carga responsabilidad colectivo, si ta trata di un caso di maneho general gubernamental.”

E splicacion aki segun nos ta encera cu e ministro, tanten e ta ministro, ta carga exclusivamente e responsabilidad pa su cartera. Ningun luga, tampoco den e memorie van toelichting ta papia di traspaso di responsabilidad. Ta parce no mas cu logico cu si e ta ausente pa enfermedad, pa biahe den exterior, o vacacion, cu tin areglo entre e ministronan pa substitucion temporal, cual ta e caso tambe. Pero den e caso cu nos ta contempla awor no ta trata di esey. E ministro ta ausente, segun declaracion di su persona y prome ministro, pa duna autoridadnan hudicial e espacio pa haci nan trabao. Esey ta mustra masha noble, pero e autoridadnan no a pidi esey y nan no mester di esey tampoco. Ta keda e problema fundamental ken ta responsabel pa e cartera dilanti Staten, e ministro sustito o e ministro mes. Y sigur esaki ta bira un problema si e periodo di ausencia bira mas largo, si por ehemplo e autoridadnan hudicial tin hopi trabao cu nan investigacion.

E ora ta bira obvio kico ta e problema cu e decision di gobierno a crea: e poder cu gobierno a usurpa pa dicidi, pa cuminsa cu un otro ministro por tuma e cartera na su encargo, y tambe con largo un ministro por ta ausente di e manera aki. Kico mester comprende bao di un tempo relativamente cortico? Un luna, dos luna, of mas? Si aki cinco luna ainda no a yega un fin na e investigacion hudicial, e lo bay keda cas te ki dia, exactamente? Te dia cu Ministerio Publico laga sa cu nan no ta bay persigui e ministro penalmente mas? Y si al contrario nan ta bay persigui su persona, keto bay ta surgi e pregunta: kico ta bay pasa, e ta keda sinta, e ta keda ausente, e ta tuma su retiro, parlamento ta dicidi di carga nan responsabilidad y ta termina confiansa den e ministro? Si, manera nos a anticipa den un editorial anterior, dia di eleccion yega y ainda no a termina cu e investigacion, e ta keda sinta na cas te cu fin di su periodo yega?

Naturalmente cu gobierno ta keda insisti cu ta oposicion ta busca problema unda no tin, pasobra kico lo tin di malo pa un ministro ausenta algun tempo pa… pa haci kico anto? Reflexiona riba su bida y su futuro? Esey e lo mester haci den su tempo liber, ta paga su persona pa eherce e funcion, no pa laga otro hende hacie.

Tumando tur esaki na consideracion, ta importante pa parlamento trata e asunto aki, pasobra ta solamente parlamento por haci esaki. Naturalmente tur hende cu dos placa di tino sa cu lo tin 12 parlamentario pa defende ciegamente loke gobierno a caba di haci. Al fin y al cabo, respeta constitucion ta exigi un cierto desaroyo cultural y intelectual cu ta demasiado ausente den e cultura politico di nos. Pero tur esaki tin un bentaha grandi pa oposicion. E ministro en cuestion lo keda ‘hang around’ te dia di eleccion, strobando asina su partido di campaña.

Mira di e banda ironico aki, e actuacion incorecto aki, cu ta crea un precedente peligroso y innecesario, lo keda pa lunanan largo un estorbo pa e partido den gobierno por campaña libremente, sin cu e fantasma aki ta manera un sombra scur riba tur cos cu nan kier haci. Laga nan resolve nan mes problema.