A traves di un comunicado di prensa, minister di Asuntonan di Adulto Mayor, Ursell Arends a informa cu ayera, diaranson 20 di december 2023, el a confirma e transferencia di fondo pa SABA, a traves di un carta dirigi na Raad van Toezicht di SABA. Esaki ta trata di e suma pa e rechttrekking di salario di trahadonan di SABA, cu ta wardando desde 2008.
Minister Arends a remarca mediante e comunicado cu cuido pa adulto mayor ta un pilar di compasion, sigurando dignidad y comodidad pa esnan cu a forma e comunidad, esta e adultonan mayor.
El a señala cu e personanan cu ta dedica profesionalmente na e rol aki mester posee un empatia profundo, dunando sosten invaluable y compania na e adultonan mayor. Pa e motibo aki, Ministerio di Adulto Mayor a reuni frecuentemente cu Raad van Toezicht di SABA, sindicato SEPPA y tambe a instala un werkgroep independiente pa yega na solucionnan.
E mandatario a indica cu durante tratamento di cambio di presupuesto 2023, Parlamento di Aruba a aproba e fondo adicional pa SABA relaciona cu e rechttrekking y mediante e comunicado publica ayera ariba su pagina di Facebook oficial, el a informa cu Gobierno di Aruba a transferi e suma conforme e presupuesto di SABA di aña 2022.
Minister Arends a remarca cu e pago a wordo haci na SABA bao reserva di tur derecho, mirando cu segun administracion di gobierno, e fondonan aki a wordo paga den pasado na SABA caba. Sinembargo, el a agrega, un investigacion independiente ta mustra cu e fondo aki nunca realmente a yega na e trahadonan di SABA.
Minister Arends a resalta cu e punto di bista di Gobierno di Aruba ta cu e discusion entre maneho di gerencia y Gobierno no mester bay na costo di e trahadonan di SABA. Esaki a conduci na e decision pa aproba y paga e suma menciona anteriormente. “Nos a percura pa e fondonan por ta disponibel y asina cumpli cu e trahadonan di SABA,” el a remarca.
