Gobierno a ricibi 10.9 miyon florin pa yuda cu crisis Venezuela 

Diabierna ultimo, gobierno di Aruba a ricibi ayudo di 10.9 miyon florin di Hulanda. Esaki debi na e situacion dificil na Venezuela y e impacto negativo cu esaki por tin riba nos pas.

Na luna di mei, e mandatario di nos pais a reuni cu varios persona y instancia entre otro Premier Rutte, Secretario di Estado Knops, Comision di Reino di 1ste y 2de kamer,  Raad van Staten y cu diferente stakeholders riba e efecto cu Venezuela tin riba pais Aruba.

Mirando con preocupante e situacion di Venezuela ta y su impacto riba e pais ta grandi y multiple riba diferente tereno. Riba tereno di inmigracion, infrastructura, enseñansa, social, siguridad y salubridad. Hulanda a bay di acuerdo pa pone un suma di 10.9 miyon pa por yuda Aruba, Boneiro y Corsou combati e efectonan di e crisis di Venezuela. Simultaneamente, Aruba y Hulanda a anuncia e bon noticia aki.

E 10.9 miyon florin aki no ta placa pa Venezuela. E ta placa pa Aruba y tin di bay na e metanan specifico cu a wordo palabra cu Hulanda. Mas tanto e placa ta bay pa fortifica nos fronteranan y nos institutonan. Pa haci Aruba mas sigur pa asina atende cu e crisis miho posibel. E ta pa yuda Aruba controla nos fronteranan miho pa asina nos percura pa domina e crisis cu nos tin internamente.

Segun e comunicado cu Bon Dia Aruba a ricibi ta indica, Prome Minister a enfatisa cu e placa aki no ta un prestamo cu Aruba lo mester paga bek. E ta un donacion/ayudo pa Aruba por maneha e situacion. “Esaki sigur ta un bunita gesto di Hulanda y ta muestra cu e crisis di Venezuela y impacto ta wordo reconoci eynan tambe” Premier Wever-Croes a duna di conoce.

E placa ta pa yuda tambe cu emigracion y atende cu e fluho di persona mas agilmente. Lo yuda tambe cu e unidad di asilo. Na e momentonan aki, e cantidad di peticion pa asilo ta na 1000 y Gobierno mester atende cu nan pa motibo di tratadonan internacional. Gobierno a pone 10 persona cu tawata den overtolligheidspool den e unidad di asilo y a pesar cu nan ta haciendo un bon trabou, 1000 peticion ta keda hopi pa atende.

Warda nos Costa lo wordo fortifica. Control riba lama y tera lo bira mas estricto pa asina evita importacion ilegal di substancianan, arma como tambe di persona. E tema di mensenhandel y mensensmokkel (traficacion humano) ta un problema serio cu ta tumando luga demasiado hopi den nos region. Pa esaki lo inverti den ampliacion di Kustwacht, pa patruya nos awanan y asina evita importacion ilegal, y transporte ilegal di hende.

Lo bin mas cel na Polis y na KIA. Tambe cu parti di e placa aki lo amplia e capacidad di detencion na unda esunnan ilegal por keda mientras nan ta warda e fecha cu nan wordo manda bek nan pais. Esaki den e tempo aki ta hopi importante y necesario mirando e fluho di ilegalidad na Aruba a aumenta. Ampliacion di e capacidad di detencion lo trece mas trankilidad.

Parti di e fondo aki lo wordo uza tambe pa enseñansa temporal, pa muchanan cu ta bin for di Venezuela cu no por drenta nos scolnan, pa garantisa cu nan ta haya educacion durante e tempo cu nan ta na Aruba. Asina evita cu nan ta bira un peso pa comunidad y evita mas problema social.

Ta bon pa remarca si, cu e placa aki lo no ta disponibel pa crea vivienda of cubri otro gastonan di personanan cu ta bin haci peticion di asilo. Tampoco e placa por wordo uza pa cubri gastonan di operacion di Gobierno. E placa aki ta bay pa fortifica Aruba como pais, den haci Aruba mas fuerte y mas sigur, y asina por atende cu e crisis miho posibel.

“Mi ta hopi satisfecho cu nos a yega na e punto unda cu Aruba a haya e fondo aki. Hopi ta esunnan den departamentonan di Gobierno cu a traha hopi duro pa awe nos a yega asina leu y mi ta gradici nan. A pesar cu esaki no ta tur loke nos tin mester pa atende cu e crisis, nos ta gradici Hulanda pa e fondo aki, pasobra e ta sigur un bunita gesto di parti di Hulanda. E 10.9 miyon florin aki ta hopi necesario. Combina cu e helicopter, cu e radar, Gabinete Wever-Croes lo percura pa haci Aruba mas sigur den tur circunstancia, cu of sin crisis di Venezuela. Nos compromiso ta un Aruba mas sigur pa cada ciudadano”, Prome Minister Evelyn Wever-Croes a duna di conoce.