Awe tabata un dia particular pa motibo cu tabatin un bishita historico. Ernst Noorman embahador di Reino na Bogota y Fernando Antonio Grillo Rubiano Embahador di Colombia na Den Haag, pa prome biaha a dicidi di biaha hunto y bin Aruba y Corsou pa trata diferente tema di importancia.
Conhuntamente cu Prome Minister Evelyn Wever-Croes coleganan Minister Geoffrey Wever y Minister Dangui Oduber, tambe tabata presente den e reunion cu e embahadornan y a trece varios punto padilanti.
Segun un comunicado di prensa, e temanan cu a trata ta entre otro: oportunidadnan cu por tin riba tereno economico cu Colombia pa asina por tin mas contacto comercial. Tambe e tema di salud considerando cu Colombia ta un Pais hopi importante pa salud di pashentnan di Aruba. A palabra cu lo sigui amplia e posibilidad pa mas hospital na Colombia por atende pashent di Aruba. Tambe a trata e tema di imigracion di Venezuela, cu ta un tema cu ta afecta Aruba y Colombia hopi. Lo sondea posibilidadnan con por traha hunto riba esaki, pa e impacto di e crisis migratorio Venezolano, wordo sinti menos aki na Aruba.
Relacion entre Aruba y Colombia
Prome Minister a splica cu tin bon relacion entre Gobierno di Aruba y Gobierno di Colombia. E ultimo bishita cu tabatin cerca di e Minister President na Colombia, tabata 2 aña pasa net prome cu Covid. Na e ocasion ey, a reconfirma palabracionnan pa sigui traha hunto riba tereno di siguridad, comercial economico y salud.
Pa conclui, Prome Minister a bisa cu e tabatin un hopi bon reunion cu ambos Embahador di Colombia na Den Haag y tambe cu e Embahador di Reino na Bogota, unda cu a haci palabracion (cu lo sigui elabora riba nan), pa crea mas oportunidad y mas posibilidad pa yiunan di tera.
