Cu e confirmacion di e anterior sentencia di Corte di Husticia di e Islanan, ayera Corte Supremo Hulandes (Hoge Raad), a pone un fin na un odisea di hopi aña, cu e apertura inmediato di matrimonio na Aruba y Corsou pa pareha di mesun sexo. Como cu ambos gobierno a declara, anterior na e sentencia caba, cu nan lo obedece e veredicto, esaki ta implica tambe cu no mester e cambio di ley mas pa haci e derecho efectivo. Naturalmente cu gobierno, si nan ta serio den nan respet pa decision di Corte Supremo, lo sigui cu un proyecto di ley cu ta cambia e articulonan concerni den nos Codigo Civil. Pero e parehanan cu ta desea di registra pa matrimonio, segun Corte Supremo, no tin mester di warda ningun cambio di ley pa exigi cumplimento di nan derecho.

E bataya dilanti Corte Supremo en realidad nunca tabata concerni un debate tocante e pregunta si e prohibicion di matrimonio pa pareha di mesun sexo tabata discriminacion cu tabata atenta contra Constitucion di Aruba, ni Corsou. Riba e punto ey gobierno(nan) ya a admiti practicamente caba cu e discriminacion tabata un hecho. E punto principal di e apelacion gubernamental tabata e pregunta si huez den e caso aki tabatin e facultad pa expresa un ‘verklaring voor recht’, cual ta un veredicto ‘bindend’ (vinculante), cu cual e partido cu no a haya razon mester cumpli. Gobierno di ambos isla tabata opina cu di e manera aki huez ta sinta riba stoel di e otro podernan, esta poder ehecutivo y legislativo. Corte Supremo a ‘overrule’ e pensamento aki y no ta keda gobierno nada otro cu haci e preparacion necesario pa ricibi peticion pa matrimonio di e pareha di mesun sexo, cu ta acudi na e despacho corespondiente pa registra. Den esaki, trato igual manera cualkier otro pareha.

Loke ta keda awor ta un baño di awa friu pa hopi den comunidad cu tin otro pensamento y ta opone por principio e matrimonio pa pareha di mesun sexo. E impresion cu tabata bin di e actual gabinete tabata inclina hende na pensa cu un veredicto na fabor di e ciudadano cu ta opone e tipo di matrimonio aki, ainda tabata posible. Esey no tabata e caso y den e conseho di Abogado General na Corte Supremo ya tabatin fuerte indicacion den ki direccion e veredicto final lo a bay; en todo caso no den esun di mantene matrimonio pa pareha di sexo opuesto so. Y esey ta completamente logico tambe, ora nos ta parti di un Reino cu ya a bay den direccion di reconoce cu e discriminacion ey, prohibi pa nos propio Constitucion ademas, nunca por a haya apoyo.

Despues di tur esaki, nos ta keda cu un par di pregunta. Entre otro, pakico henter e pantomima den parlamento algun tempo pasa, mientras cu ya e conseho di Abogado General tabata conoci y cu dificilmente lo a mira Corte Supremo desvia di e conseho ey. Lo a forza e tratamento den Staten pa, sea mustra cu no tin apoyo suficiente pa pasa e ley, pero cu tambe a duna ambos banda oportunidad di mustra forza pa nan ‘achterban’? O tabata e proposito pa mustra e Corte, cu no lo a dicidi ainda, cu nada bon no tabata bay sali di e tratamento parlamentario y cu tabata importante usa e instrumento di e ‘verklaring voor recht’ pa dicidi e asunto ‘de una vez por todas’? Ni si esey tabata e proposito, nos ta kere cu di tur manera Corte Supremo no tabata di bay dicidi diferente, pa un motibo masha simple: un Corte Supremo no ta bay crea un privilegio special pa un cierto teritorio (chikito) dentro di Reino, unda ta maneha otro regla cu den e demas teritorionan, siendo cu e apelante na nomber di e teritorio ey mes no ta disputa e hecho cu e prohibicion ta viola su propio Constitucion…

Simplemente gobierno a perde e bataya oportunista pa tene e asunto den nan propio man, si Corte Supremo no lo a permiti hueznan anterior dicta orden pa cumpli cu Constitucion, unda probablemente esaki lo a bira e mesun cancion interminable, manera nos por a mira cu e ley di Ombudsman. Gobierno lo por a keda ‘chica’ e asunto aki pa hopi tempo, manteniendo apoyo di un grupo grandi cu un posicion pro matrimonio solamente pa pareha di sexo opuesto den e asunto aki, por lo menos te na eleccion di 2025. E situacion manera el a keda awor no ta faborable pa gobierno, cu mester bay splica e ‘achterban’ aki, pakico den corte si a admiti cu e prohibicion ta un violacion di Constitucion, pero ‘cara a cara’ dilanti e hendenan aki no tabata asumi e posicion ey y tabata laga nan cu e creencia cu un victoria den e corte mas halto di Reino ainda tabata posible. Tur cos negativo cu resulta for di e debacle gubernamental aki lo ta di propio fabricacion, y no ta keda nada mas cu cana e caminda legislativo pa percura cu nos leynan ta cuadra cu nos ‘derecho’. Ley no ta skirbi den piedra y ora otro pensamento cuminza reina den comunidad, ta bira tempo pa cambio. Nos no tin ningun ilusion cu e caso aki ta e ultimo unda ta tarda pa cambia ley, pasobra ta kere cu por gana tempo y apoyo electoral cu practica malabarismo cu proyecto di ley. Nos ta parti di un nacion mas grandi cu nos mes y na cual nos ta pertenece pa motibo valido cu gran mayoria ta apoya. Nos Corte Supremo, no di nan so, a papia…

LJMADURO – 12-JUL-2024